Infermierët janë shtylla e një sistemi shëndetësor dhe roli i tyre është i pamohueshëm në trajtimin e pacientëve.
Se infermierët mbajnë barrën më të madhe me pacientët, e vërteton edhe angazhimi deri në sakrificë i grave kosovare për të qenë në krye të detyrës. Një prej tyre, Luljeta Musliu, u detyrua të marr infuzion nga stërmundimi në Klinikën e Nefrologjisë në QKUK, shkruan Gazeta Shneta.
“Pas një dite 12 orëshe dhe të stërngarkuar me punë në mungesë të Infermiereve, pason ky shpërblim. Mbi të gjitha ose e kisha dorën e lehtë sic thonë pacientët ose nuk ndjeva dhimbje nga lodhja”, ka deklaruar ajo.
Ndërsa dy të tjera në komunën e Kaçanikut ecin me kilometra në këmbë për të qenë afër pacientëve. Mamitë 53-vjeçare nga Kaçaniku, Teuta Isufi-Dogani së bashku me koleget e saj, ka një vit që ecin më gjatë se pesë kilometra në ditë që t’i vizitojnë fëmijët deri në moshën trevjeçare dhe nënat e reja nëpër shtëpitë e tyre, në kuadër të projektit të vizitave shtëpiake mjekësore të nisur nga Ministria e Shëndetësisë.
“Ne e kemi ditur që do të na presin këto sfida. E njohim edhe terrenin, se terreni është edhe kodrinor-malor. Një pjesë e rrugës u takon atyre për të na sjellë në fshat (me veturë), pjesën tjetër ne e kalojmë vetë, në këmbë. Ecim edhe më shumë se 5 kilometra. Nuk janë vetëm 5 kilometra, edhe më shumë. Është vështirë, nuk është edhe lehtë, ballafaqohemi me shumë vështirësi. Ndonjëherë është moti i lig, bie shi ose frynë shumë ose është edhe borë edhe ngrirë, por megjithatë, ia keni arritur qëllimit t’i kryejmë”, ka deklaruar Teuta Isufi-Dogani.
Në Kosovë llogaritet të jenë rreth 6 mijë infermierë të papunë. Në QKUK këtë vit është hapur një konkurs për rreth 100 pozita të lira, por kjo nuk do të zbus numrin e të papunësuarve. Për këtë shkak Kosova rrezikohet të zbrazet nga stafi i mesëm, pasi kërkesat për ta janë të mëdha nga vendet si Gjermania.
Infermierët kanë shprehur disa herë pakënaqësitë edhe me kushtet në të cilat punojnë dhe me miratimin e ligjit për paga, ku janë kategorizuar me koeficient 2.2. /Gazeta Shneta/