Ish-drejtori i Spitalit të Vushtrrisë Dr. Hajrullah Saraqi po vazhdon të kundërshtojë shkarkimin e tij nga ana e drejtorit të përgjithshëm të SHSKUK-së Dr. Basri Sejdiu.
Saraqi ka shkruar një koment në Facebook ku ka thënë se para se të shkarkohej i ishte kërkuar dorëheqja për shkak të votave dhe partisë, shkruan Gazeta Shneta.
“Mua më shkarkuan nga pozita e drejtorit në spitalin e Vushtrrisë përkundër një performance të shkëlqyer me 7.5 milionë euro investime nga donacionet, për një grusht votash. Merre me mend më kërkuan dorëheqje sepse është në interes të partisë. Unë nuk kam qenë drejtor i zgjedhur nga PDK, dhe për këtë më shkarkuan pa pasur për 5 vite asnjë akuzë apo aferë korruptive”, ka shkruar Saraqi.
Edhe në ditët pas shkarkimit Saraqi kishte deklaruar se kishte pranuar një telefonatë nga Sejdiu i cili i kishte kërkuar dorëheqjen, por ai nuk kishte pranuar duke thënë se i kishte kërkuar arsye pse duhej ta bënte një gjë të tillë. /Gazeta Shneta/
