Dy kompanitë “Security Code” dhe “Quantic” i kanë reaguar kryeministrit Albin Kurti, pasi ky i fundit i bëri përgjegjëse për mos kryerjen e detyrave të tyre në dy rastet e djegies së veturës së drejtorit të Auditorit të Brendshëm në SHSKUK.
Kurti sot ka vizituar SHSKUK-në ku ka folur për rastin e djegies së dy veturave të Musa Vitisë, i cili mban pozitën e drejtorit të Njësisë së Auditorit të Brendshëm në këtë institucion.
Kurti ndër të tjera tha se dy kompanitë “Security Code” dhe “Quantic” nuk kanë qenë në krye të detyrës së tyre për të mbikëqyrur sigurinë në oborrin e Qendrës Klinike Universitare të Kosovës.
“Kompania e cila e bënë sigurimin fizik, ose më mirë të themi do të duhej ta bënte sigurimin fizik me kontrata të trashëguara që i kemi nga e kaluara, është “Security Code”, ndërkaq kompania e cila do të duhej ta bënte vrojtimin përmes kamerave që janë të drejtuara kah oborret, quhet “Quantic”. Pra “Quantic” dhe “Security Code” nuk kanë qenë në nivel të përgjegjësisë as me 19 gusht as me 7 tetor. Me 19 gusht është hera e parë kur është ndjegë vetura, me 7 tetor është hera e dytë kur i është djegë vetura drejtorit të Auditimit në ShSKUK”, ka deklaruar Kurti.
Por këto dy kompani kanë reaguar duke deklaruar se nuk është në përgjegjësinë e tyre siguria e parkingjeve.
Ponari i kompanisë “Security Code”, Milazim Lushtaku tha se Kurti e përmendi firmën e tij “për arsye politike”. “Përmendja e Kurtit, ma shumë është nga ana politike, se për anën profesionale”- tha Lushtaku. Derisa, shtoi se sa i përket kompanisë së sigurim ata i janë përgjigjur kontratës, duke shtuar se tash me rastin merret policia.
“Sa i përket kompanisë si sigurim aty, na i kemi përgjigj kontratës.. Ne jemi në rregull, tash merret policia” – nënvizoi ai.
Ndërkaq kompania “Quantic” ka deklaruar se nuk e ka përgjegjësi mbikëqyrjen e sigurisë përmes kamerave.
“Ne si kompani “Quantic” jemi fitues të kontratës për mirëmbajtjen e laurave dhe vijushmërise në punë , dhe nuk kemi kontratë për mirëmbajtje të kamerave apo vendosjë të tyre. Në pikat dalëse të laurave janë 6 kamera që janë vendosur nga kompania e kalume që janë përdorur për nevoja të kompanisë për t’i kontrolluar terminalet se a janë në funksion dhe asesi për vezhgim, pozicioni tyre është në drejtim të terminaleve”, kanë deklaruar nga kjo kompani. /Gazeta Shneta/