Kryetari i Odës së Mjekëve Dr. Pleurat Sejdiu ka deklaruar se mbi 1200 punëtorë shëndetësorë janë të infektuar deri më tani me Covid-19. Ai ka deklaruar se 200 mjekë janë raste aktive ku 12 prej tyre janë në gjendje të rëndë
Kryetari i Odës së Mjekëve të Kosovës, Plaurat Sejdiu ka thënë se mbi 1,200 punëtorë shëndetësorë kanë qenë të infektuar me coronavirus.
“494 mjekë janë infektuar ku 200 nga ta janë ende raste aktive. Ky numër është shqetësues duke pasur parasysh kapacitetet që kemi dhe numrin e plakur të mjekëve”, tha ai, përcjell Telegrafi.
Sejdiu thotë se 12 mjekë janë nën mbikëqyrje intensive të kolegëve dhe shpresojnë se edhe ata do të kthehen në punë së shpejti.
Ai thotë se infektimi i mjekëve është sfidë edhe për popullatën. “Popullata duhet të bëjë më shumë kujdes që të na ruaj edhe personalin tonë shëndetësorë”, tha Sejdiu për Dukagjinin.
Kryetari i Odës së Mjekëve të Kosovës thotë se mosha më e atakuar në Kosovë në coronavirusi është ajo nga 30-39 vjeçe.
Ai thotë se kapacitetet humane të mjekëve pavarësisht se janë shtuar nuk janë të mjaftueshme për të përballuar fluksin e pacientëve me coronavirus. “Lodhja ka filluar të ndjehet në mesin e kolegëve tanë”, tha ndër të tjera Plaurat Sejdiu.