Institucionet publike shëndetësore aktualisht janë në kolaps sa i përket rëntgenit. Kjo për shkakun se ka mungesë totale të filmave për fotografimin e pacientëve. Radiologët po detyrohen t’i lexojnë imazhet në CD, të cilat në shumë raste nuk hapen dhe pacientët detyrohen të rrezatohen nga dy herë radhazi
Në pothuajse të gjitha institucionet publike shëndetësore në nivelin tretësor nuk ka ‘dry filma’ të rëntgenit. Mungesa e këtij materiali ka vështirësuar punën e radiologëve të cilët po detyrohen që t’i lexojnë imazhet e incizuara në CD, shkruan Gazeta Shneta.
Por disa pacientë janë ankuar se edhe CD-të në disa raste nuk kanë funksionuar dhe është dashur që të rrezatohen nga dy herë radhazi. Mungesën e filmave Gazeta e ka konfirmuar në QKUK dhe Spitalin e Prizrenit. Madje në këtë të fundit është ndërprerë shërbimi përkohësisht për rastet ambulantore dhe pacientët e shtrirë në spital. Sipas burimeve, radiologët në Prizren po punojnë vetëm me rastet emergjente të cilat i lexojnë në kompjuterë.
Drejtori i Spitalit të Prizrenit, Dr. Afrim Avdaj, ka konfirmuar mungesën e filmave por ka thënë se janë në procedurë të blerjes urgjente. “Kemi marr aprovimin nga SHSKUK që të bëjmë blerje emergjente deri në 1 mijë euro. Nuk e di saktë sa do të jetë sasia, por mund t’ju konfirmoj se do të furnizohemi së shpejti”, ka deklaruar Avdaj.
Ndërkaq menaxhmenti i SHSKUK-së në një përgjigje për Gazetën, fajin ia kanë hedhur ankesave të kompanive në OSHP. “Zyra për informim ju konfirmon se për momentin nuk ka në stok Dry digital filma. Për këtë, procedurat janë udhëhequr nga MSH-ja. Zyrtarët e MSH-së, na kanë njoftuar se lënda gjendet në shqyrtim në OSHP. Vonesat kohore të shqyrtimit në OSHP, kanë ndikuar që mos të kemi kontratë valide dhe rrjedhimisht edhe mos furnizim”, thuhet në përgjigjen e SHSKUK-së. /Gazeta Shneta/