Neurokirurgjia pediatrike është një degë e rëndësishme e mjekësisë që trajton patologjitë e sistemit nervor te fëmijët, duke përfshirë anomalitë kongjenitale, tumoret dhe traumat. Sipas neurokirurgut Dr. Nehat Halili, këto ndërhyrje janë shpesh të domosdoshme për të shpëtuar jetën e fëmijëve ose për të parandaluar dëme të pakthyeshme në zhvillimin e tyre.
“Në kuadër të neurokirurgjisë së përgjithshme, kemi edhe neurokirurgjinë pediatrike, e cila ka një dhomë prej 3 shtretërsh ku vendosen fëmijët që trajtohen për shkak të traumave, anomalive kongjenitale dhe tumoreve”, shpjegon Dr. Halili në një intervistë për Gazetën Shneta.
Sipas tij në repartin e neurokirurgjisë pediatrike në QKUK trajtohen sëmundje të ndryshme duke filluar nga anomalitë kongjenitale deri te dëmtimet traumatike.
“Në kuadër të neurokirurgjisë pediatrike trajtojmë fëmijë me hidrocefali, tumore të trurit, dëmtime të palcës kurrizore dhe trauma nga aksidentet. Këto patologji nëse nuk trajtohen në kohën e duhur mund të shkaktojnë pasoja serioze”, u shpreh Dr. Halili.
Tutje ai shpjegon se shkaqet e këtyre e ndërhyrjeve neurokirurgjikale mund të jenë të ndryshme.
“Disa fëmijë lindin me këto probleme si në rastin e hidrocefalisë ndërsa të tjerët i zhvillojnë për shkak të infeksioneve dhe traumave”, tha tutje ai.
Në lidhje me diagnostifikimin, Dr. Halili tregon se metoda që përdoret për diagnostifikimin e këtyre patologjive janë skaneri CT dhe rezonanca magnetike.
“Këto metoda ndihmojnë në marrjen e një pamjeje më të qartë të gjendjes së trurit dhe palcës kurrziore, duke i dhënë kirurgut të dhënat më të sakta për trajtimin e duhur”, shton ai.
Për këto detaje dhe këshilla të tjera, ndiqni intervistën: