Shkarkohet nga pozita e ud. drejtoresha e Administratës në Spitalin e Mitrovicës, Ferdane Myftari

2022-06-15 në ora 09:33

Drejtoresha e Spitalit Regjional të Mitrovicës, Luljeta Zhubi, ka shkarkuar dy ditë më parë nga pozita e UD. Drejtoreshën e Administratës dhe Shërbimeve të Përbashkëta, Ferdane Myftarin.

Myftari thotë se për një vendim të tillë nuk është lajmëruar paraprakisht përmes email- it zyrtarë, madje ajo sqaron se për një vendim të tillë nuk ka qenë i njoftuar as këshilli drejtues e as bordi.

“Unë kam shku me diskutu rreth punëve që i kemi pas edhe më tha që po më vjen keq por kam marrë vendim me të shkarku, kjo ka qenë. Jo, as në email nuk më ka tregu”, sqaroi ajo.

Ajo thotë se deri më tani nuk ka pranuar asnjë arsyetim për shkarkimin e saj nga ana e drejtoreshës së spitalit.

“Arsye nuk më ka dhënë. Kjo punë ka shkuar si vendim i risistemimit të vendit të punës”, tregon tutja ajo për Gazetën Shneta.

Drejtoresha Zhubi sqaron se një vendim i tillë është marrë për shkak të riorganizimit të punës dhe tashmë në pozitën e Myftarit është vendosur zyrtarja për financa, në po të njejtën pozitë, Ushtrues Detyre, pasi që ende nuk është hapur konkursi për këtë pozitë. Në anën tjetër, Zhubi bënë të ditur se kah muaji shtator do të hapet konkursi, “pas pushimeve të verës”.

“Po. Riorganizimi i vendit të punës. Zyrtarën për Financa (e kam përcaktuar në këtë pozitë) po është UD deri në konkurs, e planifikojmë diku pas pushimeve verore diku në shtator”, thotë ajo, përderisa shton se vendimi për shkarkim të Myftarit ka qenë vendim i brendshëm.

“Ka qenë vendimi ynë i brendshëm. Nuk ka nevojë (me bisedu me bord) se atë bordi nuk e ka emru e kam emru unë kur e kam marrë pozitën unë jam përgjegjëse nëse e shkarkoj apo e riemroj dikë tjetër”, pohon ajo për Gazetën Shneta.

Zhubi gjithashtu bënë të ditur se dje e ka lajmëruar Myftarin për shkarkim ndërsa masnesër, 16.06.2022, fillon punën në pozitën e re si udhëheqëse në qendrën riedukimit të vazhdueshëm profesional infermierorë.

“Gojarisht e kam njoftu. Ne i mbajme mbledhjet e mëngjesit dhe në takim përsonalisht e kam njoftu. Përmes email-it e kisha njoftu nëse ish kon ma larg diku ne cdo ditë i kemi mbledhjet e mengjesit”, tregon ajo.

Myftari ka qenë në pozitën UD e drejtorisë së Administratës që nga 14 korriku i vitit të kaluar./Gazeta Shneta/