Një numër gjithnjë e më i madh i fakulteteve të mjekësisë në Shtetet e Bashkuara po i japin prioritet edukimit në fushën e ushqyerjes, në përpjekje për të përgatitur më mirë mjekët e ardhshëm për sfidat e sëmundjeve kronike që lidhen me stilin e jetesës.
Së fundmi, 19 shkolla të tjera të mjekësisë janë bashkuar me një iniciativë kombëtare që kërkon përfshirjen e të paktën 40 orëve të edukimit mbi nutricionin, ose një niveli të barasvlershëm kompetencash, në programet e tyre mësimore duke filluar nga vjeshta e vitit 2026.
Me këtë vendim, numri i përgjithshëm i shkollave të mjekësisë që kanë aderuar në këtë nismë ka arritur në 73. Iniciativa synon të forcojë njohuritë e studentëve të mjekësisë mbi rolin e dietës në parandalimin dhe menaxhimin e sëmundjeve kronike, si diabeti, obeziteti, hipertensioni dhe sëmundjet kardiovaskulare.
Ekspertët kanë kritikuar prej vitesh faktin se edukimi mbi ushqyerjen ka zënë një vend të kufizuar në kurrikulat tradicionale të mjekësisë, pavarësisht se faktorët ushqimorë luajnë rol kyç në shëndetin e pacientëve. Sipas mbështetësve të iniciativës, mjekët duhet të jenë në gjendje të ofrojnë këshilla të bazuara në prova shkencore për ushqimin, njësoj siç përshkruajnë barna apo trajtime të tjera.
Përveç shkollave të mjekësisë, tetë organizata kryesore të akreditimit, testimit dhe certifikimit mjekësor kanë njoftuar gjithashtu se do të punojnë për forcimin e përmbajtjeve të lidhura me nutricionin në arsimin mjekësor, provimet profesionale dhe programet e specializimit. Ky zhvillim konsiderohet një hap i rëndësishëm drejt promovimit të mjekësisë parandaluese dhe luftimit të epidemisë së sëmundjeve kronike të lidhura me ushqyerjen. /Gazeta Shneta/