Shpërthimi aktual i virusit Ebola në pjesën lindore të Republikës Demokratike të Kongos po vazhdon të zgjerohet me ritme shqetësuese, duke regjistruar një nga rritjet më të mëdha ditore të rasteve që nga shpallja e epidemisë në maj të këtij viti.
Sipas të dhënave më të fundit, janë konfirmuar 837 raste me Ebola dhe 196 viktima. Shumica e rasteve janë regjistruar në provincën Ituri, ndërsa ekspertët paralajmërojnë se numri real mund të jetë edhe më i lartë për shkak të vështirësive në gjurmimin e kontakteve dhe vonesës në identifikimin e shpërthimit, shkruan burimi Medical News Today transmeton Gazeta Shneta.
Infektologia amerikane Monica Gandhi shpjegon se epidemia po shkaktohet nga varianti Bundibugyo i virusit Ebola, një lloj më pak i zakonshëm për të cilin aktualisht nuk ekziston vaksinë apo trajtim i miratuar. Sipas saj, autoritetet fillimisht nuk e identifikuan saktë llojin e virusit, gjë që ndikoi në vonesën e reagimit dhe lejoi përhapjen e tij në komunitet.
Një tjetër faktor që po e vështirëson kontrollin e situatës është fakti se shpërthimi po zhvillohet në zona të prekura nga konflikte të armatosura. Lëvizjet e popullsisë, pasiguria dhe vështirësitë në zbatimin e masave shëndetësore kanë penguar izolimin e rasteve dhe gjurmimin efektiv të kontakteve.
Megjithëse aktualisht nuk ka vaksinë të licencuar kundër variantit Bundibugyo, shkencëtarët kanë nisur punën për zhvillimin e disa kandidatëve të rinj. Organizata Botërore e Shëndetësisë ka vlerësuar mundësinë e përdorimit të vaksinave ekzistuese, por ekspertët konsiderojnë se ato duhet të përdoren vetëm në kuadër të studimeve shkencore.
Pavarësisht rritjes së numrit të rasteve, specialistët nuk besojnë se shpërthimi do të shndërrohet në pandemi globale. Ebola përhapet vetëm përmes kontaktit të drejtpërdrejtë me lëngjet trupore të personave të infektuar dhe nuk transmetohet përmes ajrit apo nga persona pa simptoma.
Sipas ekspertëve, nëse vazhdojnë masat e izolimit, karantinimit dhe gjurmimit të kontakteve, shpërthimi pritet të vihet nën kontroll. Megjithatë, suksesi do të varet nga mbështetja ndërkombëtare, prania e ekipeve shëndetësore në terren dhe zhvillimi sa më i shpejtë i vaksinave dhe trajtimeve të reja. /Gazeta Shneta/