Autoritetet shëndetësore në Argjentinë po hetojnë një shpërthim të rrezikshëm të hantavirusit, i cili dyshohet se lidhet me anijen turistike antarktike “MV Hondius”.
Sipas burimit The Independent UK, situata ka shkaktuar shqetësim ndërkombëtar pasi tre pasagjerë europianë humbën jetën pas infektimit me virusin Andes, një formë e hantavirusit që shkakton sëmundje të rëndë të mushkërive, transmeton Gazeta Shneta.
Ministria e Shëndetësisë në Argjentinë raportoi 101 raste të konfirmuara që nga qershori i vitit 2025, pothuajse dyfish më shumë se një vit më parë.
Ekspertët besojnë se ndryshimet klimatike kanë ndikuar drejtpërdrejt në përhapjen e virusit. Temperaturat më të larta dhe reshjet e pazakonta kanë krijuar kushte ideale për shumimin e brejtësve që mbartin hantavirusin.
Virusi transmetohet kryesisht përmes kontaktit me urinën, pështymën ose jashtëqitjet e minjve, sidomos në ambiente të mbyllura dhe të paajrosura.
Simptomat fillestare ngjajnë me gripin: temperaturë, ethe, dhimbje muskujsh dhe koke, gjë që e bën diagnostikimin të vështirë në fazat e hershme. Në raste të avancuara, mushkëritë mbushen me lëngje dhe sëmundja mund të bëhet fatale.
Sipas ekspertëve, rastet e hantavirusit dikur kufizoheshin në Patagoni, por tani shumica e infektimeve po regjistrohen në veri të Argjentinës, duke treguar se ndryshimet klimatike po transformojnë hartën epidemiologjike të vendit. /Gazeta Shneta/