Ajo quhet Hana Selmani, e cila po konsiderohet një storie suksesi pikërisht në intelegjencën artificiale.
Hana së fundmi ka krijuar programin për zbulimin e depresionit përmes inteligjencës artificiale.
Ajo ka përfunduar studimet në Nju Jork, University Abu Dhabi.
“Mentorja ime, profesoresha Mai Oudah, merret me studimin e informatikës, dhe më saktë studime informatike që merren me mikrobiomën. Hulumtimi përqendrohej në dy pyetje kryesore: a do mund të zbulohet depresioni përmes IA-së, dhe a do të zbulojmë lidhje mes një pjesës fizike të trupit si mikrobioma e zorrëve dhe një sëmundjes mendore si depresioni. Pasi që arrita me përgjigje pohuese të dy pyetjeve kryesore, u përqendrova në optimizmin e programit, që të jetë sa më i saktë dhe efikas që mundet. Performanca finale është gati se e përkryer, me 99% kategorizim të saktë. Motivimi i këtij projekti është që të krijohet një vegël efektive, e qasshme, dhe me kosto të ulët. Diagnozat tradicionale psikiatrike mund të jenë të kushtueshme dhe të paarritshme për një pjesë të madhe të popullsisë, prandaj nevojitet një vegël si kjo”, është shprehur ajo.
Ajo tregon se në këtë studim, u përdorën teknikat e të mësuarit të makinerive (machine learning), apo IA, për të ndërtuar një model parashikues i bazuar në të dhënat e mikrobiomës së zorrëve për qëllime të zbulimit të depresionit. Në mënyrë më të kuptueshme, kjo do të thotë që “makina”, apo modeli i IA-së, trajnohet dhe mëson nga të dhënat e mikrobiomës së zorrëve.
Këta të dhëna janë të shënuara dhe të ndara mes mikrobiomës me depresion dhe mikrobiomës “të shëndoshë” (pa depresion). Modeli fillon të dallojë mes profilit të mikrobiomës me depresion dhe të asaj pa depresion-dhe në këtë mënyrë, në hapin e testimit hiqen shënimet dhe modeli duhet të gjej cila mikrobiomë është me depresion dhe cila është pa depresion.
“Modeli arrin saktësi deri më 99% për shkak se programi që e krijuam identifikon një profil të 30-50 mikrobeve të cilat janë më informative dhe diskriminative për të dalluar mes klasave depresion” dhe “shëndoshë”. Kjo paraqet një kontribut tjetër me atë që mikrobet e identifikuara mund të merren nga studime biologjike për të zbuluar lidhje apo shkaqe mes këtyre mikrobeve dhe depresionit. Ata që janë të interesuar për më shumë detaje teknike dhe rezultate, këta mund t’i gjejnë në publikimin ndër titullin “Using Machine Learning for Depression Detection Based on Gut Microbiome“ në Springer Nature”, tha ajo. /Albinfo