SHSKUK ka paguar afër 100 për qind më shtrenjt produktin ‘Adenosine’ të blerë nga kompania ‘Pharma Leader’, sesa Ministria e Shëndetësisë. Kjo e fundit e kishte blerë produktin e njëjtë nga kompania e njëjtë me çmim 7.5 euro, ndërsa SHSKUK e ka paguar me 14.48 euro.
Ministria e Shëndetësisë në prill të vitit 2018 e kishte kontraktuar produktin ‘Adenosine’ nga kompania ‘Pharma Leader’ nga prodhuesi ‘Vianex’ në Greqi. MSH kishte blerë 1306 ampula 3mg/ml me çmim 7.50 euro për njësi ose në total 9795 Euro, shkruan Gazeta Shneta.
Kontrata me kohëzgjatje prej 12 muaj ishte nënshkruar nga udhëheqësi i Prokurimit në MSH atë kohë Artan Fejza, dhe në anën tjetër nga Gëzim Kalaveshi në cilësinë e drejtorit të kompanisë ‘Pharma Leader’.
Dy vjet më vonë, në tetor të vitit 2020 i njëjti produkt u kontraktua nga Shërbimi Spitalor Klinik Universitar, por kësaj radhe me çmim gati dyfish më të lart.
SHSKUK e bleu ‘Adenosine’ me çmim 14.48 Euro nga e njëjta kompani ‘Pharma Leader’ e cila është furnizuar nga i njëjti prodhues ‘Vianex’ Greqi. Kontrata është me kohëzgjatje prej 24 muaj dhe është nënshkruar nga zyrtari përgjegjës i Prokurimit në SHSKUK Selami Krasniqi dhe Agron Sadiku, menaxher i shitjes në kompaninë ‘Pharma Leader’.
Me këtë kontratë SHSKUK i ka blerë nga ‘Pharma Leader’ 3220 ampula ‘Adenosine’ me çmim total prej 46,625.60 Euro. Çmimi i të njëjtit produkt ka pësuar rritje prej gati dyfish nga 7.5 euro në 14.48 euro në periudhën prej prill 2018 – tetor 2020.
Gazeta Shneta ka kërkuar sqarime nga zyrtarët e SHSKUK-së. Shërbimi Farmaceutik i këtij institucioni nuk ka dhënë sqarime pse nuk është referuar në çmimet e rajonit dhe nëse kanë qenë në dijeni për çmimin e produktit në vendin e origjinës, në këtë rast në Greqi. Ata kanë deklaruar se nuk e kanë gjetur këtë produkt në data-bazat e shteteve të rajonit, dhe si rezultat janë bazuar në një kontratë paraprake të SHSKUK-së në vitin 2016 me çmim 15 euro për ampulë 3mg/ml me një kompani tjetër. Por nuk kanë treguar pse nuk janë bazuar në kontratën e MSH-së të vitit 2018.
“Çmimi referent i produktit Adensosin 3mg/ml është kërkuar në data-bazat e shteteve të rajonit ku nuk kemi gjetur asnjë referencë. Në pamundësi të referimit në këto lista jemi orientuar në kontratën paraprake që SHSKUK ka pasur për këtë produkt dhe në çmimet nga barnatoret komunitare”, thuhet në përgjigje.
Megjithëse thonë se janë bazuar në kontratën e vitit 2016, Shërbimi Farmaceutik i SHSKUK-së shkon tutje në mbrojtje të çmimit të dyfishtë duke e arsyetuar tani me pandeminë.
“Produkti është iniciuar në gusht të vitit 2020 gjatë kohës së pandemisë, periudhë gjatë së cilës ka pasur lëvizje të mëdha të çmimeve të barnave dhe materialeve medicinale”, thuhet në përgjigje.
Sipas Udhëzimit Administrativ 02/2019 “Rregullimi i çmimit të produkteve dhe pajisjeve medicinale” të nënshkruar nga ish-ministri Uran Ismaili në vitin 2019, çmimet referente të produkteve medicinale duhet të merren për bazë nga çmimet e rajonit ose nga vendi i origjinës. Vendet referente sipas Nenit 6.1 janë Shqipëria, Maqedonia, Mali i Zi dhe Kroacia. Ndërsa Neni 6.7 përcakton se “Në qoftëse produkti medicinal nuk posedon autorizim marketing as në këto shtete, atëherë si çmim krahasues – referent sigurohen të dhënat zyrtare nga vendi i origjinës”.
Sipas platformës “Galinos” në Greqi çmimi me shumicë i produktit ‘Adenosine’ nga prodhuesi ‘Vianex’ është 9.06 Euro për një pako me 6 ampula 3mg/ml, që për njësi i bie 1.51 Euro.
Gazeta ka kërkuar sqarime edhe nga kompania ‘Pharma Leader’ por të njëjtit nuk janë përgjigjur që nga dita e hënë kur redaksia i ka dërguar pyetjet përmes adresës elektronike.
Ndryshe kompania ‘Pharma Leader’ është në pronësi të Arbona Sadikut me 80 për qind të aksioneve dhe Visar Qazimit me 20 për qind të aksioneve. Kjo kompani më herët ka pasur edhe dy aksionarë të tjerë. /Gazeta Shneta/