Shërbimi Spitalor Klinik dhe Universitar i Kosovës (ShSKUK) ka njoftuar se sot, në parkingun e administratës së QKUK-së, ka ndodhur një incident që përfshiu dëmtimin e veturës private të drejtorit të QKUK-së, Osman Hajdari.
ShSKUK-ja ka thënë se rasti ka ndodhur në rrethana të panjohura, rreth kohës së fillimit të mbledhjes së paraparë të Bordit Drejtues të ShSKUK-së. Për incidentin janë njoftuar organet kompetente, transmeton Gazeta Shneta.
Njoftimi i plotë:
Sot, në parkingun e administratës së Qendrës Klinike Universitare të Kosovës (QKUK), ka ndodhur një incident që përfshin dëmtimin e veturës private të ushtruesit të detyrës së drejtorit të QKUK-së, e parkuar në parkingun e administratës.
Dëmtimi ka ndodhur në rrethana ende të panjohura, në kohën kur po bëheshin përgatitjet për fillimin e mbledhjes së rregullt të Bordit Drejtues të Shërbimit Spitalor dhe Klinik Universitar të Kosovës (ShSKUK), e cila ishte paraparë të mbahej në hapësirat e administratës qendrore të ShSKUK-së.
Për incidentin janë njoftuar menjëherë organet kompetente, përfshirë Policinë e Kosovës, e cila tashmë ka filluar procedurat e nevojshme hetimore për të sqaruar rrethanat e këtij rasti.
ShSKUK shpreh shqetësim dhe keqardhje lidhur me rastin, duke ofruar bashkëpunimin e plotë me autoritetet përkatëse.