Shërbimi Spitalor Klinik Universitar i Kosovës nuk ka treguar përqindjen e furnizimit me barna dhe material shpenzues.
Në klinikat e QKUK-së dhe në spitale rajonale ka mungesë të disa materialeve shpenzuese dhe barit pantoprazol. Gazeta Shneta ka mësuar se mungojnë disa lloje të shiringave dhe kanilave, si dhe gaza të pamjaftueshme në salla të operacionit.
Për barin pantoprazol Barnatorja Qendrore e SHSKUK-së ka thënë se ka zëvendësim, teksa për materiale tjera ka deklaruar se janë lidhur kontratat.
Nga SHSKUK nuk i kanë treguar Gazetës për përqindjen e furnizimit me barna dhe material shpenzues sipas Listës Esenciale të Barnave.
“Jemi te furnizuar me produktet e lartecekura per nevojat e Klinikave dhe Spitaleve rajonale jane lidhur kontratat, ndersa sa i perket Pantoprazol ampulla kemi alternativa. Per te gjitha sfidat qe kane te bejne me furnizimin me barna dhe material medicinal jane duke u shqyrtuar mundesite per mbulimin me furnizim ne menyre qe te sigurohet mbarevajtja ne punen e njesive kerkuese te SHSKUK-së”, thuhet në përgjigjen e shefes së barnatores Dardane Mehaj.
Ajo ka thënë se mungesa e furnizimeve kanë të bëjnë kryesisht me vonesat e liferimeve dhe trajtimin e lëndëve në OSHP. /Gazeta Shneta/