Shërbimi Spitalor Klinik dhe Universitar i Kosovës (ShSKUK), ka mirëpritur në takim përfaqësuesit nga Agjencia Japoneze për Bashkëpunim Ndërkombëtar (JICA).
Osman Hajdari, zëvendësuesi i drejtorit të përgjithshëm të QKUK së bashkë me drejtoreshën e Klinikës së Radiologjisë, Shkëndije Nuza dhe Zyrën për donacione në QKUK/ShSKUK, ka pritur në takim zyrtarët e Agjencisë Japoneze për Bashkëpunim-JICA.
Arsyet e takimit mes palëve ishin informimi nga afër i mundësive që ka QKUK për ofrimin e shërbimeve shëndetësore në rast nevoje për shtetasit japonez.
“Gjatë takimit me z. Nagata Yoshiaki, përfaqësuesi i JICA dhe znj. Shuto Minako, këshilltare shëndetësore, është diskutuar lidhur me mundësitë që ka QKUK për ofrimin e shlrbimeve shëndetësore, në rast nevoje për shtetasit japonez”, ka theksuar ShSKUK-ja.
Agjencia Japoneze për Bashkëpunim Ndërkombëtar (JICA) ka mbështetur Kosovën në shumë fusha sidomos në ngritjen e kapaciteteve shëndetësore:
“Z. Hajdari, falenderoi përfaqësuesit e Jica për përkrahjen që kanë dhënë me pajijsje mjekësore për QKUK, duke i njoftuar përfaqësuesit e Jica, se klinikat e QKUK-së, në rast nevoje janë të gatshme të ofrojnë kujdes për të gjithë qytetarët, përfshirë edhe ata japonezë. Kurse drejtoresha e Klinikës së Radiologjisë, Shkëndije Nuza, ka njoftuar se shërbimet radiologjike ofrohen 24-orë”, theksohet tutje në deklaratën e ShSKUK-ës.
Po ashtu, delegacioni i JICA, bashkë me zv. drejtorin Hajdari, kanë vizituar Klinikën e Neurologjisë, ku nga afër kanë parë disa nga pajisjet mjekësore që ishin dhuruar si donacion, përfshirë Rezonancën Magnetike. /Gazeta Shneta/