Në fillim të këtij muaji ministry i Shëndetësisë Rifat Latifi ka nënshkruar ndryshimet në statutin e QKUK-së, i cili ka mundësuar rikthimin e shërbimit të kardiologjisë invazive në Klinikën e Kardiologjisë. Por SHSKUK ende nuk e ka zbatuar plotësisht këtë ndryshim, ndërsa kardiologët invaziv po e refuzojnë atë
Ministri i Shëndetësisë javë më parë miratoi plotësim-ndryshimin e Statutit të QKUK-së që shërbimi i kardiologjisë invazive të rikthehet nga Klinika e Kardiokirurgjisë në atë në Kardiologjisë. Me plotësim-ndryshimin e këtij statuti, shërbimi kardiologjik invaziv është rikthyer në kuadër të Klinikës së Kardiologjisë, pasi i njëjti ishte zhvendosur në Klinikën e Kardiokirurgjisë në vitin 2016, shkruan Gazeta Shneta.
Me të ndryshuar statuti i një klinike duhet të ndryshohen edhe kontrata e personelit shëndetësorë, megjithkëtë një gjë e tillë nuk është duke u zbatuar nga Shërbimi Spitalor Klinik Universitar. Asnjë nga mjekët – kardiologët invazivë nuk e kanë nënshkruar kontratën e re.
Për këtë çështje Gazeta ka kërkuar sqarime nga menaxhmenti i SHSKUK-së por të njëjtit nuk kanë kthyer përgjigje.
Përveç kësaj, Gazeta Shneta merr vesh nga burimet se shefat e klinikave të Kardiologjisë janë duke refuzuar t’i përgjigjen drejtorit të Kardiologjisë, pavarësisht ftesave mbajtjen e mbledhjeve të përbashkëta. Sipas burimeve të Gazetës, shefat e kardiologjisë invazive nuk kanë pranuar të takohen në dy takime gjatë kësaj jave, të martën dhe të mërkurën.
Në anën tjetër, shefi i mjekësisë koronare në klinikën e Kardiologjisë Artan Ahmeti e mohon një gjë të tillë. Ai thotë se të gjithë shefat e reparteve kanë qenë prezentë në takimet e mbajtura, përderisa thekson se nuk ka informacione nëse kardiologët invaziv po hezitojnë nënshkrimin e kontratave të reja dhe transferimin e tyre nga Kardiokirurgjia në Kardiologji.
“Kemi qenë prezentë dhe është diskutu në drejtori për procedurat administrative të statutit të ri që kërkon ndërrimin e kontratës së drejtorit të kardiokirurgjisë dhe ndërrimin e kontratave të kardiologëve të cilët kanë punuar në Kardiokirurgji deri tash. Nuk kam informacion të tillë që ka hezitim të mjekëve (për nënshkrim të kontratës së re). Në takimin që e kemi pas me drejtorin e ShSKUK-së kanë qenë vetëm çështjet procedurale jo diçka tjetër. Ne jemi taku, shefat e kardiologjisë me drejtorin mirëpo është çështje procedurale”, ka deklaruar ai për Gazetën Shneta.
Ahmeti poashtu sqaron se Klinika e Kardiologjisë nuk ka marrë asnjë masë ndaj mjekëve të cilët janë të pakënaqur me ndërrimin e Statutit dhe hezitojnë transferimin në Kardiologji. Ai thotë se në procedurat për ndërrim të Statutit nuk marrin pjesë mjekët pasi që një gjë e tillë është kompetencë e ministrisë, sipas tij, mjekët nuk duhet të pyetën për këtë çështje.
“Klinika nuk ka marrë masa asgjë sepse përgjegjësinë e ka drejtoria e ShSKUK-së. Nuk e kemi një informacion të tillë që ka persona të tillë të cilët po hezitojnë. Të them të drejtën asnjëherë për përpilimin e statutit nuk marrin pjesë mjekët, statutet bëhen për të gjitha klinikat dhe nuk bëhet vetëm për një klinik të caktuar, nëse organizohet klinika as nuk duhet me u pyet mjekët. Kompetencën e përpilimit të statutit e ka Ministria e Shëndetësisë nuk e ka klinika”, u shpreh ai.
Në anën tjetër, 13 kardiologë invazivë përmes avokatit kanë adresuar pakënaqësinë e tyre për ndryshim të Statutit tek Kryeministri i Kosovës, Albin Kurti.
Në kërkesën e tyre thuhet se një urdhër i tillë i nënshkruar nga ministri Latifi është në dëm të shërbimit të Kardiologjisë Invazive, përderisa kanë vlerësuar se gjatë kësaj kohe sa shërbimet e kardiologjisë invazive kanë qenë në kuadër të Klinikës së Kardiokirurgjisë klinika ishte shndrruar në shembull të mirë për të gjithë rajonin.
Klinika e Kardiologjisë udhëhiqet nga Lulzim Kamberi. Ndërsa Kardiokirurgjia nga ushtruesi i detyrës Rifat Brahimaj.
Në lidhje me këtë, gazeta ka adresuar pyetje edhe tek drejtoria e ShSKUK-së mirëpo të njejtët nuk janë përgjigjur.
Sipas Ligjit për Shëndetësi, Neni 63, Themelimi i Shërbimit Spitalor Klinik Universitar, përmes Statutit të SHSKUK përcaktohen: numri i njësive përbërëse, autorizimet e tyre, fushëveprimi, organizimi, funksionimi, të drejtat, detyrat, përgjegjësitë dhe mënyra e kryerjes së veprimtarisë, sipas këtij ligji./Gazeta Shneta/
Ndryshohet Statuti i QKUK-së, shërbimi i stentave rikthehet në Klinikën e Kardiologjisë