Shtatzënia nuk sjell ndryshime vetëm në trupin e gruas, por edhe në strukturën dhe funksionimin e trurit. Një studim i ri ka zbuluar se truri pëson transformime të dukshme gjatë shtatzënisë dhe se një shtatzëni e dytë sjell ndryshime shtesë, të ndryshme nga ato të së parës.
Studimi, i publikuar në revistën shkencore “Nature Communications”, analizoi skanime të trurit të 110 grave, duke përfshirë nëna për herë të parë, gra që prisnin fëmijën e dytë dhe gra që nuk kishin qenë shtatzëna, shkruan burimi Health Day transmeton Gazeta Shneta.
Rezultatet treguan se gjatë shtatzënisë së parë ndodhin ndryshime të rëndësishme në të ashtuquajturin “rrjet i modalitetit të parazgjedhur”, një sistem i trurit që lidhet me vetëreflektimin, përpunimin e emocioneve dhe të kuptuarit e mendimeve dhe ndjenjave të të tjerëve.
Sipas studiuesve, këto ndryshime mendohet se ndihmojnë gruan të përshtatet me rolin e ri të nënës dhe të krijojë një lidhje më të fortë emocionale me foshnjën. Gjatë shtatzënisë së dytë, i njëjti rrjet pëson sërish ndryshime, por me intensitet më të ulët, duke sugjeruar se truri po rafinon aftësitë e fituara gjatë përvojës së parë të amësisë.
Megjithatë, shtatzënia e dytë shoqërohet me ndryshime më të theksuara në zona të tjera të trurit që lidhen me përqendrimin, vëmendjen dhe reagimin ndaj stimujve nga mjedisi. Studiuesit besojnë se këto përshtatje mund të jenë të dobishme për gratë që kujdesen për më shumë se një fëmijë njëkohësisht.
Sipas studiuesve, çdo shtatzëni lë një gjurmë unike në tru, duke treguar se procesi i amësisë nuk është vetëm një përvojë emocionale dhe fizike, por edhe një transformim i thellë neurologjik. /Gazeta Shneta/