Një studim i ri nga Mayo Clinic tregon se shumica e grave përballen me menopauzën pa kërkuar trajtim mjekësor. Sipas hulumtimit, më shumë se 4 nga 5 gra nuk kërkojnë ndihmë për simptomat e tyre, megjithëse këto mund të jenë të zakonshme dhe shpesh të ndërhyjnë në cilësinë e jetës.
“Menopauza është universale dhe simptomat e saj mund të jenë të rënda, por shumë pak gra marrin kujdesin që mund t’i ndihmojë,” tha Dr. Ekta Kapoor, endokrinologe dhe specialiste e menopauzës në Mayo Clinic. “Kjo mospërputhje ka pasoja reale për shëndetin dhe mirëqenien e grave.”
Në studim, që përfshiu gati 5,000 gra të moshës 45–60 vjeç, 34% raportuan simptoma të moderuara ose shumë të rënda. Ndër më të shpeshtat ishin problemet me gjumin (55%), shtimi në peshë (52%), vështirësitë seksuale (43%), lodhja fizike dhe mendore (40%), dhe dhimbjet muskulore e artikulare (37%).
Megjithatë, 84% e grave nuk kishin kërkuar ndihmë mjekësore. Shumica preferonin t’i menaxhonin simptomat vetë (65%), ndërsa të tjera nuk kishin kohë (37%) ose nuk ishin në dijeni për trajtime efektive (22%). Disa ndiheshin edhe të turpëruara (18%).
Vetëm 28% po merrnin aktualisht trajtim, i cili mund të përfshijë terapi hormonale, ilaçe kundër depresionit, akupunkturë, hipnoterapi ose ndryshime në stilin e jetesës
Kapoor thekson se nevojiten më shumë mjete për vetëvlerësim, aplikacione digjitale dhe edukim si për gratë ashtu edhe për mjekët, në mënyrë që të mbyllet hendeku mes nevojës dhe kujdesit dhe që gratë të jetojnë më shëndetshëm gjatë kësaj faze të jetës. /Gazeta Shneta/