Shumica e urologëve të Klinikës së Urologjisë në QKUK dëshirojnë që të ndërpritet greva e nisur nga kirurgët në dhjetor të vitit të kaluar.
Burime nga kolegjiumi i urologëve bëjnë të ditur se në mbledhjen e mbajtur të hënën, është diskutuar gjatë ndërprerja e grevës. Ndonëse ka pasur kundërshtime të ashpra për të mos “tradhtuar” kolegët e tyre nga Kirurgjia Abdominale, shumica e urologëve kanë deklaruar se do të votojnë pro ndërprerjes, shkruan Gazeta Shneta.
Vendimi për ndërprerjen ose jo me anë të votave pritet të merret të hënën e javës së ardhshme. Gazeta ka provuar të marr një deklaratë zyrtare nga drejtori i Klinikës, Dr. Sabit Mehmeti, por i njëjti nuk i është përgjigjur thirrjeve.
Kujtojmë se me shumica votash grevën e kanë ndërprerë kirurgët torakal. Aktualisht në grevë janë Kirurgjia Abdominale, Kirurgjia e Fëmijëve dhe Klinika e Syve. /Gazeta Shneta/
