Prindërit dhe ekspertët shëndetësorë po shprehin gjithnjë e më shumë shqetësim për kohën e tepruar që fëmijët kalojnë para ekraneve dhe ndikimin e saj në shëndetin mendor e fizik.
Sipas Organizatës Botërore të Shëndetësisë (OBSH), përdorimi i tepërt i teknologjisë lidhet me pagjumësi, mungesë aktiviteti fizik, ankth, depresion dhe ndjenjë izolimi, shkruan Euronews Health transmeton Gazeta Shneta.
Komisioni Evropian dhe disa vende anëtare po shqyrtojnë kufizime për përdorimin e rrjeteve sociale dhe celularëve nga të miturit.
Presidentja Ursula von der Leyen paralajmëroi masa për të kufizuar aksesin e fëmijëve në këto platforma në nivel BE-je.
Ndërkohë, Suedia ka nisur një projekt inovativ: “kartën e aktiviteteve të kohës së lirë”, që ndihmon financiarisht fëmijët nga 8 deri në 16 vjeç të angazhohen në sporte apo kurse gjuhësh, duke u ofruar alternativa të shëndetshme jashtë botës virtuale.
Megjithatë, ekspertët theksojnë se një pjesë e madhe e përgjegjësisë bie mbi prindërit.
Pediatrja gjermane Janna-Lina Kerth sugjeron që prindërit të japin shembull duke kufizuar përdorimin e telefonit në shtëpi dhe të vendosin objektiva të përbashkëta për kohën para ekranit.
Ajo këshillon gjithashtu dialog të hapur me fëmijët për rreziqet, në vend të ndalesave të rrepta, të cilat shpesh e bëjnë teknologjinë edhe më tërheqëse.
Kerth nënvizon se jo çdo kohë para ekranit është e dëmshme, duke veçuar lojërat interaktive dhe edukative si përvoja më pozitive.
Për të mbushur boshllëkun që lë kufizimi i rrjeteve sociale, ajo sugjeron aktivitete në grup si sportet apo klubet, ku fëmijët mund të lidhen me bashkëmoshatarët pa pasur nevojë për pajisje digjitale. /Gazeta Shneta/