Një studim i ri sugjeron se ulja graduale e dozës së antidepresivëve, duke vazhduar psikoterapinë, është mënyra më efektive për të parandaluar rikthimin e simptomave të depresionit.
Analiza, e publikuar këtë javë në The Lancet Psychiatry, përfshiu 76 triale të rastësishme me mbi 17,000 pjesëmarrës në Francë dhe Itali.
Studiuesit zbuluan se tërheqja e ngadaltë e ilaçeve, mbi një periudhë më të gjatë se katër javë – dhe në disa raste mbi 12 javë – duke vazhduar mbështetjen psikologjike, mund të parandalojë rikthimin e simptomave pothuajse po aq efektiv sa qëndrimi i pacientëve në trajtimin me antidepresivë.
Autorët theksuan se strategjitë duhet të përshtaten individualisht dhe se ndërprerja e medikamentit duhet të bëhet vetëm nën mbikëqyrjen e një specialisti. Terapitë mbështetëse, si terapia njohëse-biheviorale dhe ajo bazuar në vëmendje (mindfulness), mund të ndihmojnë pacientët gjatë këtij procesi.
Studiuesit vlerësuan se kombinimi i tërheqjes së ngadaltë dhe psikoterapisë mund të parandalojë rikthimin e simptomave te rreth një në pesë pacientë, krahasuar me ndalimin abrupt të ilaçeve.
Megjithatë, ekspertët paralajmërojnë se antidepresivët nuk janë të panevojshëm dhe për shumë pacientë, vazhdimi i trajtimit farmacologjik mbetet i domosdoshëm.
Ata shtojnë se të dhënat për ankthin janë më të kufizuara se sa për depresionin, dhe çdo vendim duhet të merret individualisht, duke peshuar rreziqet dhe përfitimet./Gazeta Shneta/