Departamenti Amerikan i Bujqësisë ka pushuar nga puna 70 studiues të huaj pas një verifikimi të sigurisë kombëtare që synon mbrojtjen e sistemit ushqimor të SHBA-së nga ndikimi i vendeve si Kina, Rusia, Koreja e Veriut dhe Irani.
Zyrtarët thanë se pas kontrollit, 70 persona, shumica prej tyre studiues kinezë me kontrata post-doktorale, nuk do të lejohen më të punojnë në projektet kërkimore të USDA-së. Pushimet ndodhën menjëherë pasi administrata e presidentit Trump shpalli një plan të ri sigurie që ndalon gjithashtu shtetasit nga këto vende të blejnë toka bujqësore në SHBA.
Presidenti i sindikatës së punonjësve federalë në Kaliforni, Thomas Henderson, tha se disa prej studiuesve u paraqitën në punë dhe e mësuan përjashtimin kur nuk funksiononin më kartat e hyrjes. Ai paralajmëroi se projekte kyçe, përfshirë kërkime mbi vaksina për toksina të rrezikshme në mish, janë ndalur.
“Jemi kthyer pas me vite, në mos dekada”, tha ai.
Një ndalim aktual për punësime në nivel federal i pengon laboratorët të zëvendësojnë stafin e larguar, çka rrezikon të paralizojë punën shkencore në sektorë kyç të bujqësisë amerikane.