Gjinekologu turk Ahmet Payasli po përballet me një tjetër skandal me pacientet e tij. Ai akuzohet nga ish-pacientja se nuk ia tregoi peshën reale të foshnjës gjatë ekzaminimeve, çka i shkaktoi nënës lindje të komplikuar dhe lëndime e pasoja tjera të foshnjës. Payasli poashtu kishte refuzuar lëshimin e raporteve mjekësore, duke thënë se “nuk lëshon asnjëherë raporte për të mbrojtur vetën nga ankesat”
Bujar Vitija
Gjinekologu turk Ahmet Payasli është bërë subjekt i ankesave të pacienteve të tij për dështimet dhe komplikimet në shtatzëni.
Në nëntor të vitit të kaluar, nëna me iniciale M.B. kishte arritur në javën 35 e dy ditë të shtatzënisë kur shkoi për herë të parë për t’u vizituar në klinikën private “Dr. Payasli” në Prishtinë, shkruan Gazeta Shneta.
Deri në këtë javë ajo ishte kontrolluar tek një gjinekolog tjetër, por konsideroi se mjeku turk Ahmet Payasli do ta trajtonte më mirë. Në fakt, i doli e kundërta.
Dy vizita që i bëri te Payasli rezultuan të dështuara në momentin kur nënës iu shfaqën komplikimet gjatë lindjes, të cilat e lanë beben me pasoja e lëndime.
Gazeta Shneta ka siguruar një raport të ankesës së bashkëshortit të gruas, e bërë më vonë në Inspektoratin Shëndetësor të Ministrisë së Shëndetësisë.
A.M. ka deklaruar se gruaja e tij ka kryer dy kontrollet e fundit tek Payasli më datën 01.11.2016 dhe 16.11.2016, ndërsa lindja është kryer në spitalin privat “Istanbul Medicine”.
“Në fund të kontrollave gjinekologjike pacientes nuk i janë dhënë raportet mjekësore sepse Dr. Ahmet Payasli ka pohuar se asnjëherë nuk lëshon raporte në bazë të këshillës së avokatit për ta mbrojtur veten në rast të ndonjë ankese pranë institucioneve përkatëse”, thuhet në raport.
Klinika “Dr Payasli” kishte refuzuar lëshimin e raporteve mjekësore duke shkelur kështu Nenin 9 dhe 19 të Ligjit Për të Drejtat dhe Përgjegjësitë e Qytetarëve në Kujdesin Shëndetësor, çka konfirmohet edhe nga raporti i Inspektoratit.
Ish-pacientja kërkonte t’i lëshoheshin raportet mjekësore “duke përfshirë peshën e embrionit dhe çdo analizë mjekësore në bazë të së cilës është konstatuar se pacientja M.B. vuan nga diabeti gestacional, edhe pse kanë pasur në dispozicion analizën e sheqerit me mbi ngarkesë”.
Në raport tutje thuhet se në kontrollin e dytë më datën 16 nëntor, Payasli i ka thënë pacientes së pesha e embrionit është 3200 gram, çka rezulton më vonë se nuk ka qenë e vërtetë. Kjo i kushtoi foshnjës me lëndime dhe pasoja të tjera gjatë lindjes, shkruan Gazeta Shneta.
“Nga asistentja e mjekut të lartpërmendur, pacientja është informuar se lindja mund të kryhet në spitalin ‘Istanbul Medicine’, me të cilin kishin marrëveshje dhe se ky spital i posedonte të gjitha kapacitetet teknike dhe profesionale për kryerjen e lindjes”, thuhet në raport.
Fjalë të tjera ka dhënë vet mjeku Payasli në deklaratën e tij para inspektorëve të MSH-së. Ai thotë se pacientja është paraqitur pa ndonjë problem në vizitën e parë dhe të gjitha analizat i ka pasur në rregull, përkundër se kishte pasur në dispozicion analizën e sheqerit me mbi ngarkesë.
Ndonëse Payasli i kishte thënë nënës se pesha e bebes është 3200 gram, në deklaratën e tij thotë se nuk ka mundur të përcaktojë peshën e fetusit “për shkak të obezitetit morbid të nënës”.
Me ultrazë të kohëve të fundit një gjë e tillë do të mund të vërehej pa ndonjë problem, sikurse vet Payasli ku ka mund të vërej se “dopleri i arteries umbilikale ka qenë normal, lëngu amniotik poashtu si dhe placenta me fundus GRADE 2”, çka e ka shtyrë atë që ta rekomandoj pacienten për lindje normale.
Këtu fillon tmerri i nënës, kur paraqitet në spitalin “IMH” me ujëra të shpërthyera më datën 21 nëntor 2016 në ora 13:00.
“Në ora 22:45, pacientja merret në sallë, faza e parë dhe e lindjes shkuan në rregull por faza e fundit e lindjes pas daljes së kokës së bebes ka pas ngecje të krahësorirt dhe është bërë manevra MC ROBERTS dhe manevra VOODS është nxjerrë beba e gjallë në ora 23:15 lindë fëmija femër me peshë 4970 gr”, thuhet në Fletëlëshimin e pacientes, lëshuar nga Istanbul Medicine.
Menjëherë pas lindjes, për shkak të komplikimeve si rezultat i peshës dhe madhësisë së foshnjës, spitali ishte detyruar ta dërgonte foshnjën në Klinikën e Neonatologjisë në QKUK.
“Në pranim foshnje e gjinisë femërore, 1 orëshe e reanimuar në sallë të lindjes deri në intubim ET dhe adrenalinë. Hematomë e lehtë facioale dhe hematomë në regjionin torakal majtas”, thuhet tutje në raportin e ISH-së.
Pesha e madhe e foshnjës kishte shkaktuar komplikimet gjatë lindjes, kur foshnja ishte përballur me mosfurnizim të oksigjenit gjatë procesit.
Kjo është bërë e ditur në diagnozën përfundimtare të Klinikës së Neonatologjisë. Poashtu foshnja ishte diagnostikuar me infeksion në mushkëri, lëndim të krahut gjatë nxjerrjes nga trupi i nënës, si dhe deformimin (përshtatjen) e kokës në kanal, shkruan Gazeta Shneta.
Krejt ky komplikim mendohet se nuk do të ndodhte sikur nëna të ishte njoftuar me kohë me peshën reale të foshnjës, për çka do të rekomandohej për lindje cezariane. Kjo ka mbetur të konstatohet nga Komisioni Etik Profesional.
Ky komision pritet të vlerësojë nëse ka pasur shkelje etike dhe profesionale edhe në moskonstatimin e peshës së fetusit gjatë dy kontrollave.
Raporti i është drejtuar edhe Bordit Qendror për Licencim dhe Regjistrim të profesionistëve shëndetësorë, ku kërkohet që të sqarohet nëse lejohet që profesionistët jo-kosovarë të licencohen pa e njohur gjuhën shqipe dhe ku komunikimi me pacientët kryhet me përmes përkthyesit.
Në bazë të vlerësimeve nga këto dy organe, Ahmet Payasli mund të mos licencohet më kurrë për veprimtarinë e tij në Kosovë.
Payasli tanimë është duke u hetuar edhe nga Prokuroria e Shtetit pas një bastisje që u iniciua nga Administrata Tatimore e Kosovës.
Gazeta Shneta ka kontaktuar me klinikën “Dr. Payasli”, por kanë refuzuar të flasin duke thënë se nuk mund të përgjigjen deri në përfundim të hetimeve. /Gazeta Shneta/