Shkencëtarët nga University College në Londër kanë zhvilluar një skaner të ri që përdor dritën lazer në vend të rrezeve X, çka pritet të revolucionarizojë diagnostikimin dhe trajtimin e sëmundjeve si artriti, diabeti dhe disa lloje kanceri.
Kjo teknologji, e quajtur Tomografia Fotoakustike (PAT), krijon imazhe 3D në kohë reale duke përdorur valët që prodhohen nga drita lazer në inde, shkruan CNN, transmeton Gazeta Shneta.
Ndryshe nga versionet e mëparshme, të cilat kërkonin sekonda ose minuta për të krijuar imazhe, skaneri i ri realizon këtë proces brenda më pak se një sekonde. Skaneri është i aftë të shfaqë detaje të qarkullimit të gjakut dhe enëve të vogla në trup, të cilat shpesh janë të vështira për t’u parë me teknika të tjera.
Ky përparim teknik mund të sjellë një pajisje portative, e cila do të përdoret në klinika rutinë, duke shmangur nevojën për rrezet X dhe skanerët e shtrenjtë MRI.
Kjo pajisje premton të përmirësojë diagnostikimin e kancerit, pasi tumoret shpesh kanë një rrjet të dendur të enëve të gjakut që nuk dallohen mirë me metodat aktuale.
Megjithatë, shkencëtarët nënvizojnë se nevojiten më shumë studime përpara se kjo teknologji të bëhet pjesë e përdorimit të gjerë klinik./Gazeta Shneta/