Autoritetet shëndetësore në Spanjë kanë konfirmuar 111 raste të limfomës anaplastike me qeliza të mëdha të lidhur me implantet e gjirit (BIA-ALCL), një formë e rrallë e kancerit që është raportuar te gratë me implante mamare.
Sipas Agjencisë Spanjolle për Barnat dhe Pajisjet Mjekësore (AEMPS), deri në vitin 2025 janë regjistruar gjithsej 146 raste të dyshuara, prej të cilave 111 janë konfirmuar pas vlerësimeve mjekësore, shkruan Euronews Health transmeton Gazeta Shneta.
Ky lloj kanceri nuk zhvillohet në indin e gjirit, por në qelizat e sistemit imunitar që mund të formohen në kapsulën e indit që rrethon implantin.
Raporti tregon se numri më i madh i rasteve është regjistruar në Madrid, i ndjekur nga Andaluzia, Katalonja dhe Valencia.
Ekspertët theksojnë se bëhet fjalë për një sëmundje shumë të rrallë dhe se rreziku mbetet i ulët krahasuar me numrin e madh të grave që kanë implante gjiri. Megjithatë, autoritetet shëndetësore vazhdojnë monitorimin dhe mbikëqyrjen e rasteve për të mundësuar diagnostikim sa më të hershëm.
Sipas studiuesve, shkaku i saktë i zhvillimit të kësaj sëmundjeje ende nuk është përcaktuar. Ndër faktorët që po hetohen janë lloji i implantit, predispozitat gjenetike, proceset inflamatore dhe faktorë të tjerë të mundshëm që lidhen me implantet.
Autoritetet shëndetësore theksojnë se deri më tani nuk është vërtetuar një lidhje shkak-pasojë përfundimtare dhe kërkimet shkencore mbi këtë sëmundje vazhdojnë./Gazeta Shneta/