Në Gaza City, spitali al-Shifa është shndërruar në një qendër emergjente mes rrënojave, ku mjekët kryejnë operacione pa anestezi dhe pa pajisje të nevojshme.
Sulmet intensive izraelite kanë sjellë fluks të pafund viktimash, duke detyruar mjekët të marrin vendime ekstreme mes jetës dhe vdekjes.
Mjekë vullnetarë australianë treguan për raste tronditëse, përfshirë një operacion urgjent ku u shpëtua një foshnje nga barku i nënës së saj, e cila ishte vrarë nga bombardimet. Ata përshkruan sallat e operacionit të mbushura me gjak, mungesën e qetësuesve dhe pacientët që vuajnë në dhimbje ekstreme, shkruan BBC transmeton Gazeta Shneta.
Ndërkohë, tanket izraelite janë vetëm pak qindra metra larg spitalit, teksa ofensiva tokësore përshkon qytetin. Sipas OKB-së, mbi 320 mijë njerëz janë zhvendosur nga Gaza City, ndërsa ushtria izraelite llogarit deri në 640 mijë të larguar. Por kostot e larta të evakuimit e bëjnë të pamundur shpëtimin për shumë familje.
Shifrat e fundit tregojnë se mbi 65 mijë palestinezë janë vrarë që nga tetori 2023, ndërsa spitalet në jug tashmë janë jashtë kapaciteteve dhe kampet humanitare të mbipopulluara.