Pesë mjekë janë dërguar për gjykim nga ana e Prokurorisë së Fierit, pasi dyshohet se kanë neglizhuar me trajtimin mjekësor ndaj disa pacientëve.
Sipas një njoftimi zyrtar, Prokuroria ka përfunduar hetimet paraprake të çështjes penale nr.1437, viti 2022, dhe dërgon për gjykim 5 (pesë) të pandehur, mjekë të Spitalit Rajonal Fier, konkretisht të pandehurit L.V( M), E.D., A.S., A.S. dhe N.B., për veprën penale, “Neglizhenca në trajtimin mjekësor”, parashikuar nga neni 96 paragrafi i 2 Kodit Penal.
Nga provat e administruara dhe analizimi i tyre, ka rezultuar se pesë mjekët kanë neglizhuar në trajtimin mjekësor të shtetasit B.SH., i cili më pas ka ndërruar jetë.
Ky është rasti i dytë brenda pak ditësh në Fier, pasi më 15 nëntor, ishte po Prokuroria, ajo e cila ka dërguar për gjykim një mjek të spitalit rajonal Fier, i cili mendohet se për shkak të neglizhencës dhe trajtimit mjekësor jo të duhur të dhënë, ka qenë shkak për vdekjen e një pacienteje.
Sipas një njoftimi zyrtar, Prokuroria ka përfunduar hetimet dhe ka dërguar për gjykim, procedimin penal në ngarkim të shtetasit S.B., me detyrë mjek pranë urgjencës së Spitalit Rajonal Fier, i akuzuar për veprën penale të “Neglizhenca në trajtimin mjekësor”, e parashikuar nga neni 96/2 i Kodit Penal.
Nga hetimet u provua se, nga i pandehuri S.B. nuk ka vepruar në përputhje me protokollin mjekësor, të pranuar për sëmundjen nga e cila vuante shtetasja A.N., dhe se transportimi i pacientes nuk u realizua konform protokollit mjekësor me ekip të specializuar.
Si pasojë e neglizhencës në trajtimin mjekësor, shtetasja A. N. ndërroi jetë. /AlbanianPost