Në një hap të rëndësishëm drejt shëndetit dhe mirëqenies së komunitetit, Spitali i Përgjithshëm i Gjakovës është anëtarësuar në Rrjetin e Spitaleve Promovuese të Shëndetit (HPH). Pas Spitalit të Pejës, Gjakova bëhet pjesë e komunitetit global të spitaleve që promovojnë shëndetin.
Në një ceremoni të veçantë, Kryeshefi Ekzekutiv i Sekretariatit Ndërkombëtar të HPH-së, Prof. Dr. Oliver Gröne, ndau certifikatën për Spitalin e Gjakovës. Drejtori, Dr. Hilmi Shala, pranoi certifikatën, një pasqyrë e përkushtimit dhe angazhimit të ekipit të spitalit drejt standardave të larta të shërbimit shëndetësor, përcjell Gazeta Shneta.
Spitalet promovuese të shëndetit janë modeli i ardhshëm i kujdesit shëndetësor, duke përparuar përtej trajtimit të sëmundjeve në përpjekje për të përmbushur nevojat e pacientëve në mënyrë të plotë. Procesi i anëtarësimit të Spitalit të Gjakovës në HPH u mbështet nga projekti i Shërbimeve Shëndetësore të Integruara (IHS), nën patronatin e Agjencisë Zvicerane për Zhvillim dhe Bashkëpunim (SDC) në Kosovë.
Ky bashkërendim ndërkombëtar shënon një hap të rëndësishëm në përmirësimin e shëndetit dhe kujdesit shëndetësor në Gjakovë dhe përtej saj, duke e bërë spitalin një lider në kujdesin shëndetësor./Gazeta Shneta/