I plotësuar: Sqarim për dentistët: Lajmërimi i djeshëm ishte gabim teknik në listën zyrtare NACE
Vendimi për lejimin e ushtrimit të veprimtarisë për dentistët i cili ishte publikuar dje fillimisht nga Ministria e Tregtisë dhe Industrisë, e më pas edhe nga Ministria e Shëndetësisë, në fakt ishte gabim teknik.
Gazeta Shneta sot ka kërkuar sqarim nga Ministria e Shëndetësisë për çështjen e dentistëve se a lejohet të punojnë apo jo, dhe përgjigja e MSH-së është se mjekët e dhëmbëve nuk lejohet të punojnë.
“Ka qenë një gabim teknik, dentistët nuk mund të punojnë”, thuhet në përgjigjen e MSH-së për Gazetën. Vendimi për lejimin e punës për rastet urgjente vlen siç ka qenë më herët për Qendrën Klinike Stomatologjike.
Gazeta mbrëmë ka publikuar listën e plotë të bizneseve e cila u publikua fillimisht nga Ministria e Tregtisë dhe Industrisë ku veprimtaria e dentistëve ishte përfshirë me ngjyrë të Gjelbër që nënkuptonte se dentistët mund t’i rikthehen punës. E njëjta listë ishte korrigjuar sot në mëngjes nga MEPTINIS, ku rubrika e veprimtarisë së dentistëve ishte kthyer në ngjyrë të KUQE.
Por të njëjtën listë e ka publikuar mbrëmë edhe Ministria e Shëndetësisë dhe në të njëjtën dentistët ishin përfshirë si veprimtari që lejohet të punojnë.
Sidoqoftë redaksia e Gazetës Shneta sqaron lexuesit se lajmi i mbrëmshëm ka qenë i pasaktë për shkak të gabimit që është bërë në listën zyrtare të bizneseve që lejoheshin të punojnë. Për këtë redaksia kërkon ndjesë nga lexuesit dhe mjekët që mund të jenë keqinformuar.
————————————————————————————————————-
14.04.2020 – Dentistët lejohen të rikthehen në punë, kjo është lista e plotë e bizneseve që mund të punojnë
Ministria e Tregtisë dhe Industrisë ka publikuar listën e re të bizneseve me NACE code që do të lejohen të kryejnë veprimtarinë e tyre edhe gjatë kohës së masave për kufizimin e lëvizjes.
“Referuar vendimeve të Ministrisë së Shëndetësisë, për parandalimin, luftimin dhe eleminimin e sëmundjes ngjitëse në komuna të Kosovës, të 14 prill 2020, MEPTINIS ju njofton për masat për mbarëvajtjen e operatorëve ekonomik”, thuhet në njoftimin e MEPTINIS, transmeton Gazeta Shneta.
Sipas kësaj liste veprimtaritë e spitaleve do të lejohen të punojnë, duke përfshirë edhe dentistët të cilëve MSH para disa javësh ua ndaloi punën si masë parandaluese kundër përhapjes së koronavirusit. Për më tepër detaje se si do të lejohet ushtrimi i veprimtarisë për dentistët pritet që Ministria e Shëndetësisë të dal me njoftim.
Listën e re mund ta gjeni duke klikuar KËTU. Bizneset me ngjyrë të GJELBËR lejohen të punojnë, kurse ato me ngjyrë të KUQE ndalohen.
Udhëzimin për pajisje me leje të veçantë të punës mund ta gjeni duke Klikuar KËTU. /Gazeta Shneta/