Një provë klinike në fazë të hershme në Francë po hap perspektiva të reja për trajtimin e sëmundjes së Parkinsonit, duke përdorur stimulimin e qelizave nervore me dritë.
Studiuesit nga një qendër kërkimore pranë “Grenoble University Hospital”, kanë zhvilluar një pajisje të vogël që drejton rreze drite në thellësi të trurit, me synim të përmirësojë funksionin e qelizave të dëmtuara.
Teknika fokusohet në stimulimin e mitokondrive, strukturat që prodhojnë energji në qelizë, për të rritur aktivitetin e neuroneve që prodhojnë dopaminë. Këto qeliza dëmtohen rëndë gjatë përparimit të Parkinsonit.
Sipas neurokirurgut Stephan Chabardès, deri në momentin kur shfaqen simptomat, rreth gjysma e neuroneve dopaminergjike mund të jenë tashmë të dëmtuara, ndërsa pacientët humbin afërsisht 10% të receptorëve të dopaminës çdo vit.
Siç raporton Euronews, kjo e bën ndërhyrjen e hershme veçanërisht të rëndësishme.
Deri tani, teknologjia është testuar tek shtatë pacientë me Parkinson në fazë të hershme. Tek tre prej tyre është vërejtur ngadalësim i përkeqësimit të simptomave dhe përmirësim i funksionit të trurit pas stimulimit të vazhdueshëm me dritë, transmeton Gazeta Shneta.
Studiuesit theksojnë se rezultatet janë ende paraprake, por konsiderohen premtuese. Nëse efektet afatgjata konfirmohen, ekipi planifikon të kalojë në prova klinike më të mëdha për të testuar sigurinë dhe efektivitetin e metodës. /Gazeta Shneta/