Studime të fundit tregojnë se stresi financiar mund të ndikojë në zemër njësoj sa faktorët e njohur të rrezikut si presioni i lartë i gjakut dhe pirja e duhanit.
Personat që përjetojnë stres të vazhdueshëm financiar shpesh përballen me ankth, vetmi ose depresion, gjë që mund të përshpejtojë plakjen kardiake dhe të rrisë rrezikun për sëmundje të zemrës, shkruan burimi Very Well Health transmeton Gazeta Shneta.
Një analizë e 280,323 të rriturve, e publikuar në “Mayo Clinic Proceedings”, tregoi se faktorët socialë, si stresi financiar dhe pasiguria ushqimore, janë më të lidhurit me plakjen e shpejtë të zemrës.
Plakja kardiake tregon sa “e vjetër” është zemra krahasuar me moshën reale, dhe kur zemra duket më e vjetër, rritet rreziku për sulm në zemër dhe goditje në tru.
Ekspertët thonë se mjekët shpesh fokusohen vetëm te faktorët tradicionalë të rrezikut si kolesteroli, presioni i gjakut, pirja e duhanit dhe gjumi, dhe nuk marrin parasysh faktorët socialë që ndikojnë në shëndetin kardiak.
Stresi financiar është i veçantë sepse është kronik, i përsëritur dhe shpesh i pakontrollueshëm. Kjo gjendje mund të shkaktojë inflamacion sistemik kronik, i cili kontribuon në grumbullimin e pllakave në arterie, duke rritur rrezikun për arteriosklerozë, sulm në zemër dhe goditje në tru. Inflamacioni i vazhdueshëm mund të rrisë presionin e gjakut dhe të vështirësojë pompimin e gjakut nga zemra.
Studiuesit nënvizojnë rëndësinë e vlerësimit jo vetëm të faktorëve mjekësorë, por edhe të faktorëve socialë për parandalimin e sëmundjeve të zemrës.
Duke kombinuar kujdesin mjekësor dhe ndryshimet sociale, si menaxhimi i stresit financiar dhe sigurimi i ushqimit, mund të arrihet një shëndet kardiak më i mirë dhe jetë më e gjatë dhe e shëndetshme. /Gazeta Shneta/