Një studim i ri i Universitetit të Kolumbias sugjeron se kombinimi i stresit të lartë, peshës trupore dhe hormoneve ndikon në përshpejtimin e pubertetit te vajzat.
Për dekada me radhë, mjekët kanë vërejtur se vajzat po hyjnë në pubertet gjithnjë e më herët, por pa një shpjegim të qartë. Ky studim, i publikuar në “The Journal of Clinical Endocrinology & Metabolism”, propozon një “trekëndësh ndikues,” biologjik që përfshin stresin, yndyrën trupore dhe aktivitetin hormonal.
Sipas rezultateve, vajzat me nivele të larta të hormoneve të stresit dhe indeks më të lartë të masës trupore hynë në pubertet mesatarisht shtatë muaj më herët se vajzat me nivele më të ulëta, shkruan burimi Health Day transmeton Gazeta Shneta.
Studiuesit zbuluan se jo vetëm estrogjeni, por edhe hormone të tjera si glukokortikoidet (hormonet e stresit), progesteroni dhe androgjenet luajnë rol të rëndësishëm në zhvillimin e hershëm, veçanërisht në fillimin e zhvillimit të gjirit.
Autorja e studimit, Lauren Houghton, thekson se kërkimet tradicionale janë përqendruar kryesisht te estrogjeni dhe pesha trupore, ndërsa ky studim tregon se hormonet e stresit dhe androgjenet mund të jenë po aq të rëndësishme në përcaktimin e kohës së pubertetit.
Studimi analizoi të dhëna nga 1,040 vajza të moshës 6 deri në 13-vjeç në SHBA dhe Kanada, duke u fokusuar në 327 prej tyre që kishin dhënë mostra urine para fillimit të pubertetit. U vërejt se nivelet më të larta të glukokortikoideve, androgjeneve dhe progesteronit lidhen me fillim më të hershëm dhe më të gjatë të pubertetit, ndërsa disa nënprodukte të estrogjenit lidhen çuditërisht me vonesë në fillim.
Puberteti i hershëm konsiderohet kur shenjat e zhvillimit shfaqen para moshës 7–8 vjeç, por studiuesit sugjerojnë se edhe mosha 8–10 vjeç mund të jetë periudhë e rëndësishme për identifikimin e rrezikut të problemeve të mëvonshme shëndetësore, përfshirë rritjen e rrezikut për kancer gjiri në të ardhmen.
Studiuesit theksojnë se rezultatet tregojnë rëndësinë e faktorëve mjedisorë dhe të stilit të jetesës, pasi lidhja u vërejt pavarësisht historisë familjare të kancerit të gjirit.
Ata sugjerojnë se ulja e stresit dhe ruajtja e një peshe të shëndetshme mund të ndihmojnë në normalizimin e kohës së pubertetit dhe përmirësimin e shëndetit afatgjatë. /Gazeta Shneta/