Studentët e drejtimit të stomatologjisë në Universiteti i Prishtinës kanë zhvilluar një aksion protestues para Agjencia e Kosovës për Akreditim në Prishtinë, duke kundërshtuar rritjen e madhe të numrit të studentëve në këtë drejtim në disa kolegje private dhe duke kërkuar ruajtjen e standardeve akademike dhe profesionale.
Aksioni u organizua nga Lëvizja Studentore për Barazi Kritike Veprim, ndërsa studentët thanë se reagimi i tyre vjen për shkak të shqetësimeve të shumta që lidhen me mënyrën e organizimit të studimeve të stomatologjisë në disa institucione private, raporton Gazeta Shneta.
“Sot ndoshta më shumë se asnjëherë më parë e shohim të domosdoshme të bëjmë një reagim publik në emër të Lëvizjes Studentore për Barazi Kritike Veprim dhe në emër të të gjithë kolegëve studentë të drejtimit të stomatologjisë,” thuhet në deklaratën e studentëve.
Ata theksojnë se stomatologjia është një profesion shumë i ndjeshëm dhe kërkon përgatitje të gjatë akademike dhe standarde të larta profesionale.
“Stomatologjia si profesion i rëndësishëm shëndetësor kërkon përgatitje të gjatë akademike, përgjegjësi të lartë profesionale dhe standarde të rrepta në edukim. Studentët e këtij drejtimi përfundojnë gjashtë vite studime universitare dhe fitojnë titullin ‘Doktor i Stomatologjisë’, përpara se të kalojnë në stazhin profesional dhe në specializime të mëtejshme,” theksohet në reagim.
Sipas studentëve, në Universiteti i Prishtinës drejtimi i stomatologjisë është një nga programet më sfiduese dhe më konkurruese.
“Procesi i pranimit është selektiv dhe bazohet në kritere të qarta akademike, ndërsa gjatë studimeve studentët i nënshtrohen një sistemi rigoroz vlerësimi në lëndët teorike dhe praktike. Praktika klinike dhe infrastruktura universitare janë të organizuara në mënyrë që studentët të fitojnë aftësitë e nevojshme për trajtimin profesional dhe të sigurt të pacientëve,” thuhet në deklaratë.
Megjithatë, studentët pretendojnë se në disa kolegje private situata është krejtësisht ndryshe.
“Në disa institucione mungojnë kriteret e qarta për pranimin e studentëve dhe procesi i vlerësimit akademik nuk është gjithmonë i bazuar në standarde transparente,” thuhet në reagim.
Një nga shqetësimet kryesore, sipas tyre, lidhet me praktikën klinike.
“Ka raste kur studentët në këto institucione janë të detyruar të sigurojnë vetë pacientët për të realizuar praktikën klinike, ndërsa në disa raste kjo praktikë nuk realizohet fare për shkak të mungesës së kapaciteteve klinike. Kjo përbën një problem serioz për formimin e një stomatologu kompetent,” thanë studentët.
Ata ngritën shqetësim edhe për rritjen e vazhdueshme të numrit të studentëve në këtë drejtim.
“Jemi dëshmitarë të praktikave të transformimit të studentëve nga drejtime të tjera drejt stomatologjisë pa kritere të qarta, duke rritur artificialisht numrin e studentëve në këtë program,” thuhet në deklaratë.
Sipas studentëve, kjo situatë po çon në një mbingarkesë të profesionit dhe rrezikon cilësinë e shërbimeve në të ardhmen.
“Numri i stomatologëve është rritur ndjeshëm dhe sipas disa analizave vendi ynë konsiderohet ndër vendet me numrin më të lartë të stomatologëve për kokë banori në rajon dhe në Ballkan,” theksuan ata.
Duke iu referuar të dhënave të Agjencia e Statistikave të Kosovës, studentët thanë se në Kosovë janë të regjistruar rreth 2,400 stomatologë.
“Kjo do të thotë se për një popullsi rreth 1.8 milionë banorë kemi afërsisht një stomatolog për çdo 700 deri në 750 banorë. Kjo rritje e pakontrolluar e numrit të të diplomuarve nuk është në përputhje me nevojat reale të popullsisë dhe përbën një shqetësim serioz,” thuhet në reagim.
Studentët kërkuan nga institucionet përgjegjëse që të monitorojnë më rreptë standardet e studimeve dhe të marrin masa për të garantuar cilësinë e arsimit në këtë fushë të rëndësishme të shëndetësisë./Gazeta Shneta/