Një studim i ri, publikuar në revistën shkencore “Current Biology”, sugjeron se bebet në barkun e nënës mund të përsërisin gogësimën e nënave të tyre me një vonesë mesatare prej rreth 90 sekondash.
Shkencëtarët thonë se gogësima është një sjellje shumë ngjitëse edhe tek të rriturit. Kur shohim dikë të gogësijë, shpesh e bëjmë automatikisht të njëjtën gjë. Ky fenomen lidhet zakonisht me mënyrën si truri pasqyron dhe imiton emocionet apo veprimet e të tjerëve.
Por gjetjet e reja sugjerojnë se kjo aftësi mund të jetë e pranishme që përpara lindjes. Për studimin, studiuesit përfshinë 38 gra shtatzëna, mes javës së 28-të dhe 32-të të shtatzënisë, të gjitha me një ecuri normale të saj.
Secila prej grave ndoqi tre lloje videosh; njerëz që gogësinin, njerëz që thjesht lëviznin gojën dhe fytyra pa lëvizje.
Ndërkohë, studiuesit regjistruan reagimet e nënave dhe përdorën ultratinguj në kohë reale për të monitoruar lëvizjet e fytyrës së fetusit, veçanërisht buzët dhe hundën.
Kur krahasuan të dhënat, ata vunë re se fetuset fillonin të gogësinin më shpesh pasi nëna gogësinte – zakonisht rreth 90 sekonda më vonë.
Për të verifikuar rezultatet, tre ekspertë të pavarur, që nuk e dinin se çfarë videosh kishin parë nënat, analizuan regjistrimet dhe konfirmuan të njëjtat gjetje.
Studiuesit përdorën gjithashtu inteligjencën artificiale për të analizuar me saktësi lëvizjet delikate të fytyrës së fetusit dhe për të dalluar nëse bëhej fjalë për një gogësimë të vërtetë apo thjesht lëvizje të zakonshme. Sipas studiuesve, foshnjat në bark filluan të gogësinin dukshëm më shumë vetëm kur nëna gogësinte, dhe jo kur ajo thjesht hapte e mbyllte gojën ose qëndronte pa lëvizur.