Hulumtimet e reja sugjerojnë se përmirësimi i cilësisë së gjumit mund të ndihmojë në menaxhimin e impulsivitetit tek fëmijët, veçanërisht të atyre që janë të ekspozuar ndaj mjediseve stresuese.
Akademia Amerikane e Mjekësisë së Gjumit, rekomandon që fëmijët 6-12 vjeç të flenë 9-12 orë dhe adoleshentët 13-18 vjeç të flenë 8-10 orë në natë.
Megjithatë, një studim i CDC zbuloi se gati 60% e nxënësve të shkollave fillore dhe 73% e nxënësve të shkollave të mesme nuk i marrin këto sasi të rekomanduara, shkruan Health News përcjell Gazeta Shneta.
Ndërsa gjumi është kritik për shëndetin e përgjithshëm në adoleshencë, një studim i ri i botuar në revistën “Sleep Health”, zbuloi se gjumi gjithashtu mund të ndihmojë në menaxhimin e sjelljeve impulsive.
Për hulumtimin, shkencëtarët nga Instituti i Zhvillimit të Rinisë në Universitetin e Gjeorgjisë përdorën të dhëna nga 11,878 fëmijë të moshës 9-11 vjeç të financuar nga NIH.
Ekipi zbuloi se fëmijët që flinin për më pak se 9 orë ose që iu deshën më shumë se 30 minuta për të rënë në gjumë gjatë natës, kishin më shumë gjasa të shfaqnin sjellje impulsive më vonë në jetë.
Studiuesit gjithashtu theksuan se edhe fëmijët që nuk janë të ekspozuar ndaj mjediseve stresuese mund të përjetojnë impulsivitet lidhur me gjumin me cilësi të dobët.
“Shumë adoleshentë nuk kanë kohë të mjaftueshme për të fjetur dhe ata janë të privuar nga gjumi. Ky studim tregon pse është e rëndësishme të promovohet kohëzgjatja më e gjatë e gjumit duke vonuar orarin e fillimit të shkollës ose duke vendosur rutina në mënyrë që adoleshentët të dinë, ‘OK, pas kësaj ngjarje, unë do të shkoj në shtrat”.
Sipas autorëve të studimit, diçka aq e thjeshtë sa përmirësimi i rutinave të gjumit mund të jetë një strategji me kosto të ulët për menaxhimin e sjelljeve impulsive tek fëmijët dhe adoleshentët. /Gazeta Shneta/