Një studim i ri shkencor ka zbuluar një mekanizëm të rëndësishëm përmes të cilit kafeja mund të ndihmojë trupin në luftimin e efekteve të plakjes, duke hedhur dritë mbi përfitimet e saj të njohura shëndetësore.
Sipas hulumtimit të realizuar nga studiues në Texas A&M College of Veterinary Medicine & Biomedical Sciences në SHBA, disa përbërës të kafesë lidhen me një receptor në trup të njohur si NR4A1, i cili luan rol kyç në rregullimin e stresit, inflamacionit dhe riparimin qelizor, shkruan Euronews Health, transmeton Gazeta Shneta.
Profesori Stephen Safe, pjesë e ekipit kërkimor, theksoi se kjo lidhje mund të shpjegojë pse konsumimi i kafesë është shoqëruar prej kohësh me jetëgjatësi më të madhe dhe rrezik më të ulët për sëmundje kronike.
“Ne kemi treguar se disa nga efektet pozitive të kafesë lidhen me ndërveprimin e përbërësve të saj me këtë receptor, i cili ndihmon në mbrojtjen e trupit nga dëmtimet e shkaktuara nga stresi”, tha ai.
Receptori NR4A1 funksionon si një “sensor ushqyes”, duke reaguar ndaj përbërësve të dietës dhe duke ndihmuar në ruajtjen e shëndetit gjatë procesit të plakjes.
Ai është i përfshirë në kontrollin e inflamacionit, niveleve të energjisë dhe riparimit të indeve – faktorë kyç në parandalimin e sëmundjeve si kanceri dhe rënia e funksioneve njohëse.
Studiuesit zbuluan se përbërës të caktuar të kafesë, veçanërisht polifenolët, lidhen me këtë receptor dhe ndikojnë në aktivitetin e tij. Kjo lidhje mund të ndihmojë në reduktimin e dëmtimit qelizor dhe në ngadalësimin e rritjes së qelizave kancerogjene.
Një element i rëndësishëm i studimit ishte fakti se, kur receptori NR4A1 u hoq nga qelizat, efektet mbrojtëse të kafesë u zhdukën, duke forcuar rolin e tij në këtë proces.
Megjithatë, studiuesit paralajmërojnë se përfitimet e kafesë nuk lidhen vetëm me këtë mekanizëm dhe kërkime të mëtejshme janë të nevojshme për të kuptuar plotësisht ndikimin e saj në organizëm.
Studime të tjera kanë treguar gjithashtu se konsumimi i moderuar i kafesë mund të përmirësojë vigjilencën, përqendrimin dhe madje të ulë nivelin e inflamacionit. Ndërkohë, edhe kafeja pa kafeinë është lidhur me përmirësime në të nxënë dhe memorie, çka sugjeron se përfitimet nuk vijnë vetëm nga kafeina, por edhe nga përbërës të tjerë si polifenolët.
Ekspertët rekomandojnë konsum të moderuar të kafesë si pjesë e një stili të shëndetshëm jetese, duke theksuar se ajo nuk duhet të shihet si zëvendësim për kujdesin mjekësor apo ushqyerjen e balancuar.