Një studim i ri ka treguar se të rriturit mbi moshën 65 vjeç që janë nën peshë ose luhaten me më shumë se 5 përqind mund të kenë më shumë gjasa të përjetojnë rënie më të shpejtë të aftësive njohëse sesa të tjerët.
“Ne shqyrtuam të dhëna të 11 viteve mbi peshën, BMI-në dhe perimetrin e belit. Sido që t’i shikonim të dhënat, marrëdhënia ishte shumë e qartë – sa më shumë ndryshonte pesha e një personi nga viti në vit, aq më shpejt ai person përjetonte rënie njohëse”, tha Muzi Na, profesor i asociuar i shkencave ushqyese dhe autor kryesor i studimit.
Studiuesit përdorën të dhëna nga 4,304 pjesëmarrës në Studimin Kombëtar të Shëndetit dhe Plakjes në SHBA midis viteve 2011 dhe 2021. Matjet përfshinin teste të kujtesës, orientimit dhe funksionit ekzekutiv, dhe u kombinuan në një indeks të përbërë për të matur performancën njohëse, shkruan Euronews, transmeton Gazeta Shneta.
Sipas rezultateve, njerëzit që ruanin një peshë të qëndrueshme kishin shkallën më të ulët të rënies njohëse , ndërsa ata, pesha e të cilëve luhatej më shumë, kishin shkallë dy deri në katër herë më të larta të rënies.
Në një analizë tjetër, studiuesit zbuluan se humbja e 5 përqind ose më shumë e peshës, ose luhatjet midis humbjes dhe shtimit të së njëjtës sasi peshe, shoqëroheshin me rënie më të shpejtë njohëse. Të rriturit më të moshuar që vetëm shtuan në peshë përjetuan nivele të ngjashme rënieje me ata, pesha e të cilëve mbeti konstante, gjë që nuk do të thotë se shtimi në peshë është i dobishëm, theksuan studiuesit.
“Obeziteti në moshën e mesme është një faktor i njohur rreziku për rënien njohëse më vonë në jetë, por ekziston një ‘paradoks i obezitetit’, që e shoqëron obezitetin në moshën e vonë me një trajektore njohëse më të shëndetshme”, tha Na.
“Disa studime kanë zbuluar një ndërveprim kompleks midis humbjes së masës muskulore që lidhet me moshën dhe shtimit të yndyrës tek të rriturit e moshuar , dhe studimi ynë nuk sugjeron që të rriturit e moshuar duhet të shtojnë në peshë”.
Ekipi rekomandoi që pesha duhet të monitorohet vazhdimisht si një sinjal shtesë për të mbrojtur shëndetin njohës. Por Na theksoi rëndësinë e vetëmonitorimit.
“Nga një takim te mjeku në tjetrin, mënyra se si matet pesha mund të mos jetë e njëjtë”, tha Na.
“Për t’u siguruar që e kuptojnë se çfarë po i ndodh trupit dhe trurit të tyre, të moshuarit duhet ta monitorojnë peshën e tyre në shtëpi në një mënyrë më të qëndrueshme. Për shembull, një person mund të peshohet afërsisht në të njëjtën kohë në mëngjes pasi të zgjohet, para mëngjesit dhe pas një vizite në tualet, ndërsa mban të njëjtat pizhame. Kjo do t’u siguronte atyre të dhëna shumë të qëndrueshme.”
“Pastaj, nëse pesha e tyre nuk është e qëndrueshme, ata duhet t’i njoftojnë mjekët e tyre”./Gazeta Shneta/