Një studim i publikuar në The BMJ sugjeron se medikamentet e klasës GLP-1, të përdorura për trajtimin e diabetit dhe obezitetit, mund të lidhen me ulje të rrezikut për zhvillimin e varësive nga alkooli, nikotina, kokaina, kanabisi dhe opioidët.
Analiza, e realizuar mbi më shumë se 600 mijë pacientë me diabet në sistemin shëndetësor të veteranëve në SHBA, tregon se pacientët që përdornin barna si Ozempic dhe Mounjaro kishin përqindje më të ulëta të zhvillimit të çrregullimeve të përdorimit të substancave krahasuar me ata që trajtoheshin me medikamente të tjera për uljen e sheqerit në gjak.
Tek personat me varësi ekzistuese, përdorimi i GLP-1 u shoqërua me rrezik më të ulët për shtrime në urgjencë, mbidoza dhe vdekje.
Autorët theksojnë se studimi është vëzhgues dhe nuk provon lidhje shkak-pasojë.
Ata nënvizojnë nevojën për prova nga studime klinike të kontrolluara përpara se këto medikamente të rekomandohen si trajtim për çrregullimet e përdorimit të substancave./Gazeta Shneta/