Gratë që përjetojnë ankth gjatë shtatzënisë kanë më shumë gjasa të lindin më herët, sipas një studimi të publikuar nga Shoqata Psikologjike Amerikane.
Ky studim, i publikuar në revistën “Health Psychology”, analizoi lidhjen midis kohëzgjatjes së shtatzënisë dhe niveleve të ndryshme të ankthit.
Sipas autorëve, gjetjet mund t’i ndihmojnë mjekët të kuptojnë se kur dhe si të vlerësojnë më mirë ankthin për të parandaluar lindjen e parakohshme, shkruan burimi Medical Xpress transmeton Gazeta Shneta.
“Ankthi lidhur me shtatzëninë është një faktor i fuqishëm psikosocial që ndikon në rezultatet e lindjes,” tha autorja kryesore, Dr. Christine Dunkel Schetter nga Universiteti i Kalifornisë në Los Anxhelos. Ajo shtoi se ndonëse simptomat e depresionit tashmë vlerësohen gjerësisht gjatë shtatzënisë, duhet të përfshihet edhe vlerësimi i ankthit.
Hulumtimet e mëparshme kanë treguar se deri në një në katër gra shtatzëna përjeton nivele klinikisht të larta ankthi, i cili është faktor rreziku për lindje para javës së 37-të.
Studiuesit analizuan të dhënat nga 196 gra shtatzëna në Denver dhe Los Anxhelos dhe gjetën se ankthi në tremujorin e tretë lidhej më fort me lindjet e hershme.
Ata rekomandojnë që gratë të kontrollohen për ankth që në fillim të shtatzënisë, me monitorim dhe ndërhyrje të mundshme në rast se simptomat përkeqësohen. /Gazeta Shneta/