Personat që përdorin kanabis për t’u përballur me ankthin apo depresionin rrezikojnë më shumë të zhvillojnë simptoma të rënda paranoje, paralajmëron një studim i ri i publikuar në revistën BMJ Mental Health.
Sipas hulumtimit, të rriturit që fillojnë ta përdorin kanabisin si mënyrë vetë-mjekimi priren të konsumojnë sasi më të mëdha sesa ata që e përdorin vetëm për arsye shoqërore apo argëtimi.
Mesatarisht, përdoruesit raportuan rreth 206 njësi THC në javë – ekuivalente me 10 deri 17 cigare kanabisi – por shifra ishte dukshëm më e lartë tek ata që e përdornin për të përballuar depresionin apo ankthin (deri në 255 njësi), shkruan Euronews transmeton Gazeta Shneta.
“Arsyeja pse dikush nis të përdorë kanabis mund të ketë ndikim të madh në shëndetin e tij afatgjatë,” tha Dr. Edoardo Spinazzola, studiues në King’s College London.
Studimi thekson gjithashtu se personat që përdorin kanabis për ankth dhe depresion raportojnë jo vetëm nivele më të larta paranoje, por edhe simptoma depresioni e ankthi që zakonisht kërkojnë ndërhyrje profesionale.
Një tjetër gjetje shqetësuese lidhet me faktin se përdoruesit që kanë përjetuar trauma apo abuzime në fëmijëri janë më të prirë drejt paranojës në moshë të rritur, dhe kanabisi e përkeqëson këtë lidhje.
Ekspertët theksojnë se mjekët duhet të pyesin pacientët pse e kanë filluar përdorimin e kanabisit, në mënyrë që të identifikojnë herët ata që kanë nevojë për mbështetje shtesë dhe të parandalojnë pasoja të rënda në shëndetin mendor.
“Kanabisi mund të ketë efekte të rëndësishme negative në shëndetin mendor të përdoruesve,” tha Dr. Emily Finch nga Kolegji Mbretëror i Psikiatërve në Britani./Gazeta Shneta/ankthi
studim