Një studim i fundit ka nxjerrë në pah një fenomen gjithnjë e më të përhapur në familjet moderne: ndikimin e përdorimit të telefonit nga prindërit në zhvillimin emocional të fëmijëve. Studiuesit paralajmërojnë se edhe kur fëmija ndodhet fizikisht pranë prindit, mungesa e vëmendjes mund të krijojë ndjenjë shkëputjeje.
Hulumtimi mbi fenomenin e njohur si “phubbing” kur prindërit fokusohen në telefon në vend të fëmijës, tregon se truri i fëmijës e percepton këtë si një ndërprerje të menjëhershme të lidhjes sociale. Sipas analizave të publikuara, kjo mund të ndikojë në ndjesinë e sigurisë dhe stabilitetit emocional tek fëmijët, shkruan Journal of Child Psychology and Psychiatry, transmeton Gazeta Shneta.
Ekspertët shpjegojnë se gjatë zhvillimit, fëmijët varen nga sinjale të vazhdueshme si kontakti me sy, mimika dhe reagimi i prindërve për të rregulluar emocionet e tyre. Kur këto sinjale ndërpriten papritur, sistemi nervor i fëmijës mund të reagojë me stres ose pasiguri.
Studimi thekson se edhe ndërprerjet e shkurtra të vëmendjes mund të përjetohen si një “errësirë sociale” nga fëmijët, duke ndikuar në mënyrën se si ata ndërtojnë besimin dhe lidhjet emocionale.
Megjithatë, ekspertët nënvizojnë se zgjidhja është e thjeshtë: momente të vogla, por të sinqerta të vëmendjes – si kthimi i shikimit, përgjigjja ndaj zërit të fëmijës dhe ndërveprimi i drejtpërdrejtë janë thelbësore për zhvillimin e shëndetshëm emocional.
Këto ndërveprime të përditshme ndihmojnë trurin e fëmijës të mësojë se ai është i rëndësishëm dhe se marrëdhëniet janë të qëndrueshme. /Gazeta Shneta/