Një studim i botuar në revistën Nature Medicine ka hedhur poshtë bindjen e gjatë se humbja e peshës është mënyra kryesore për të ulur rrezikun e diabetit. Studiuesit kanë zbuluar se para-diabeti mund të kalojë në remision – me nivele të sheqerit që kthehen në normalitet – edhe pa humbje peshe.
Sipas studimit, rreth një në katër persona që ndjekin programe të ndërhyrjes në stilin e jetes arritën ta kthenin nivelin e sheqerit në gjak në normalitet pa humbur asnjë kilogram.
Për më tepër, ky remision i qëndrueshëm i mbron ata nga zhvillimi i diabetit po aq sa edhe humbja e peshës, shkruan MedicalXpress transmeton Gazeta Shneta.
Ekspertët theksojnë se sekreti qëndron te mënyra se si shpërndahet dhjami në trup. Dhjami i brendshëm në zonën e barkut, që rrethon organet vitale, lidhet me inflamacion kronik dhe rezistencë ndaj insulinës. Ndërkohë, dhjami nën lëkurë prodhon hormone që ndihmojnë insulinën të funksionojë më mirë.
Studimi tregon se disa njerëz arrijnë të shpërndajnë yndyrën nga barku drejt nën lëkurës, edhe pa ndryshim në peshën trupore totale. Përveç kësaj, hormonet natyrale si GLP-1, që imitojnë edhe barnat e reja kundër obezitetit, luajnë rol kyç në përmirësimin e sekretimit të insulinës.
Praktikisht, kjo do të thotë se njerëzit me para-diabet mund të përfitojnë nga dieta mesdhetare e pasur me vaj peshku, ullinj e arra, si dhe nga aktiviteti fizik i qëndrueshëm, i cili redukton yndyrën abdominale pa domosdoshmërisht ulur peshën.
Studiuesit theksojnë se humbja e peshës mbetet e dobishme për shëndetin në përgjithësi, por normalizimi i nivelit të sheqerit duhet të jetë synimi kryesor në trajtimin e para-diabetit.