Të moshuarit kanë një rrezik 61% më të lartë për goditje në tru nëse prindërit e tyre ishin divorcuar kur ishin fëmijë ose adoleshentë, raportuan studiuesit në një studim të botuar më 22 janar në revistën “PLOS One”.
Niveli i rrezikut të shtuar është në të njëjtin nivel me atë të paraqitur nga dy faktorë të tjerë të rrezikut për goditje në tru, si diabeti dhe depresioni, shkruan burimi Health Day përcjell Gazeta Shneta.
“Edhe pas marrjes parasysh të shumicës së faktorëve të njohur të rrezikut që lidhen me goditjen në tru – duke përfshirë duhanin, pasivitetin fizik, të ardhurat dhe arsimin më të ulët, diabetin, depresionin si dhe mbështetjen e ulët sociale – individët që kishin prindërit e divorcuar ende kishin 61% shanse më të larta për të pasur një goditje në tru,” tha studiuesja kryesore, Mary Kate Schilke, nga Universiteti Tyndale në Ontario, Kanada.
Për studimin, studiuesit analizuan të dhënat për më shumë se 13,200 të moshuar 65 vjeç e sipër, të mbledhura nga Qendrat e SHBA për Kontrollin dhe Parandalimin e Sëmundjeve (CDC) në vitin 2022, si pjesë e një studimi vjetor të shëndetit amerikan.
Më shumë se 7% e amerikanëve të moshuar të përfshirë në studim kishin pësuar një goditje në tru dhe gati 14% ishin fëmijë të divorcit, thanë studiuesit.
Hulumtimet e mëparshme gjithashtu kanë zbuluar se divorci i prindërve mund të ndikojë në faktorë të tjerë të rrezikut për goditje në tru, duke përfshirë presionin e lartë të gjakut dhe çrregullimet e gjumit, shtuan studiuesit. /Gazeta Shneta/