Rritja e temperaturave për shkak të ndryshimeve klimatike mund të ndikojë edhe në raportin mes lindjeve të djemve dhe vajzave.
Një studim i ri i realizuar nga studiues të University of Oxford tregon se kur temperaturat kalojnë 20°C, lindin më pak djem krahasuar me vajzat.
Rezultatet e studimit janë publikuar në revistën shkencore Proceedings of the National Academy of Sciences of the United States of America (PNAS), shkruan Euronews Health transmeton Gazeta Shneta.
Studiuesit analizuan të dhënat e më shumë se pesë milionë lindjeve në 33 vende të Afrikës Sub-Sahariane dhe në Indi.
Analiza tregoi se ekspozimi ndaj temperaturave të larta mund të rrisë rrezikun e humbjes së shtatzënisë në fazat e hershme, veçanërisht kur fetusi është mashkull.
“Temperatura ndikon në mënyrë themelore në riprodhimin njerëzor duke ndikuar se kush lind dhe kush jo,” tha bashkautori i studimit, Abdel Ghany.
Sipas tij, këto gjetje tregojnë se temperaturat kanë pasoja të matshme për mbijetesën e fetusit dhe madje mund të ndikojnë edhe në vendimet e familjeve për planifikimin familjar.
Studimi identifikoi pragun prej rreth 20°C si pikën ku fillon të vërehet ndryshimi në raportin e lindjeve. Megjithatë, temperaturat edhe më të larta nuk e rrisin proporcionalisht këtë efekt.
Ekspertët shpjegojnë se temperaturat e larta gjatë shtatzënisë mund ta vështirësojnë aftësinë e trupit të nënës për të rregulluar temperaturën.
Nëse nëna dehidrohet, fetusi mund të mos marrë mjaftueshëm gjak, oksigjen dhe lëndë ushqyese, gjë që rrit rrezikun për humbjen e shtatzënisë.
Përveç ndikimit biologjik, temperaturat e larta mund të ndikojnë edhe në sjelljen e familjeve, përfshirë planifikimin e shtatzënisë, për shkak të vështirësive ekonomike apo kufizimeve në qasje në shërbime shëndetësore.
Studiuesit theksojnë gjithashtu se ndikimi i nxehtësisë nuk është i njëjtë për të gjithë. Gratë me më pak burime ekonomike dhe ato që jetojnë në zona më të rrezikuara janë më të prekura, duke rritur shqetësimet për pabarazitë shëndetësore në kushtet e ndryshimeve klimatike.
Ndërkohë, temperaturat në Evropë po vazhdojnë të rriten.
Sipas të dhënave të World Meteorological Organization, viti 2024 shënoi një nga vitet me numrin më të madh të ditëve me stres nga nxehtësia dhe netëve tropikale, kur temperatura nuk bie nën 20°C.
Shkencëtarët paralajmërojnë se me rritjen e temperaturave globale nevojiten më shumë studime për të kuptuar ndikimin e faktorëve mjedisorë në shtatzëni dhe fertilitet, në mënyrë që të mbrohet shëndeti i nënave dhe të zvogëlohen pasojat afatgjata në lindje dhe në strukturën e popullsisë.