Një hulumtim i publikuar në revistën Nature Neuroscience tregon se korteksi cerebral – pjesa e trurit përgjegjëse për përpunimin e prekjes – nuk plaket në mënyrë uniforme, siç mendohej më parë.
Studimi, i realizuar nga DZNE, Universiteti i Magdeburgut dhe Instituti Hertie në Tübingen, zbuloi se disa shtresa të korteksit mbeten të qëndrueshme, madje edhe trashen me moshën, duke treguar shenja të forta neuroplasticiteti shkruan HealthDay transmeton Gazeta Shneta.
Duke përdorur rezonancën magnetike me rezolucion të lartë (7 Tesla), studiuesit analizuan trurin e 60 personave të moshave 21–80 vjeç dhe konstatuan se shtresat e mesme dhe të sipërme të korteksit mbeten funksionale për shkak të stimulimit të vazhdueshëm nga kontakti me mjedisin. Ndërkohë, shtresat e poshtme, të cilat modifikojnë ndjesitë prekëse, treguan shenja të hollimit me kalimin e moshës.
Prof. Esther Kühn theksoi se këto gjetje janë optimiste: aftësitë që përdoren rregullisht, si shkrimi në tastierë apo ecja, mund të ruhen gjatë gjithë jetës. Megjithatë, vështirësitë në përpunimin e stimujve të ndërlikuar, si zhurma, lidhen me rënien e shtresave të poshtme.
Studimi sugjeron se truri ruan funksionet që përdoren shpesh dhe madje aktivizon mekanizma kompensues për të luftuar plakjen qelizore.
Kjo nënkupton se aktiviteti mendor dhe fizik i qëndrueshëm mund të ndihmojë në ruajtjen e shëndetit të trurit edhe në moshë të shtyrë./Gazeta Shneta/