Më pak se gjysma e adoleshentëve amerikanë që përjetuan një episod të madh depresiv (MDE) morën kujdes shëndetësor mendor në vitin 2022, sipas një studimi të botuar në revistën PLOS Mental Health.
Situata është edhe më shqetësuese për grupet e margjinalizuara, të cilat kanë më pak mundësi për trajtim specialist.
Depresioni tek të rinjtë është rritur ndjeshëm pas pandemisë së COVID-19 dhe shpesh mbetet i patrajtuar.
Studiuesit theksojnë se depresioni gjatë adoleshencës lidhet me pasoja më të rënda shoqërore e psikologjike sesa kur fillon në moshën e rritur, ndaj ndërhyrja e hershme është thelbësore, shkruan MedicalXpress transmeton Gazeta Shneta.
Nga 11,969 adoleshentë (mosha 12–17 vjeç) të anketuar në kuadër të National Survey on Drug Use and Health, rreth 19% plotësonin kriteret për MDE.
Vetëm 47.5% e tyre kishin marrë një formë trajtimi; 39.1% kishin parë specialistë, 30.5% kishin marrë shërbime në shkollë dhe 25% kishin përdorur ilaçe.
Disparitetet ishin të dukshme: adoleshentët në zonat rurale kishin shumë më pak gjasa të merrnin trajtim specialist sesa ata në qytete, ndërsa vajzat kishin më shumë gjasa të kërkonin ndihmë se djemtë.
Nga ana tjetër, adoleshentët me ngjyrë kishin shumë më pak mundësi të përfitonin trajtim krahasuar me të bardhët jo-hispanikë.
“Adresimi i këtyre pabarazive është thelbësor për të siguruar një sistem më gjithëpërfshirës dhe më të barabartë mbështetjeje për shëndetin mendor të të gjithë adoleshentëve,” theksojnë autorët e studimit./Gazeta Shneta/