Një studim i ri i publikuar në revistën shkencore “The Journal of Immunology” sugjeron se tregues të caktuar biologjikë në gjak mund të ndihmojnë mjekët të identifikojnë herët pacientët që rrezikojnë të zhvillojnë sëmundje kritike kronike gjatë qëndrimit në njësitë e kujdesit intensiv.
Sipas studiuesve, identifikimi i hershëm i këtyre pacientëve mund të mundësojë trajtim më të shpejtë dhe më të përshtatur, duke ndihmuar në shkurtimin e kohës së qëndrimit në kujdes intensiv dhe përmirësimin e rezultateve të trajtimit, shkruan MedicalXpress transmeton Gazeta Shneta.
Hulumtimi tregon se pacientët që zhvillojnë sëmundje kritike kronike nuk karakterizohen nga dobësimi i sistemit imunitar, siç është menduar më herët, por nga një reagim i tepruar dhe i çrregullt imunitar.
Studiuesit analizuan mostra gjaku të pacientëve të shtruar në kujdes intensiv pas lëndimeve të rënda, si aksidentet në komunikacion ose traumat e tjera serioze. Mostrat u mblodhën në periudha të ndryshme gjatë trajtimit dhe u krahasuan me ato të pacientëve që u rikuperuan më shpejt.
Rezultatet treguan se pacientët që qëndruan në kujdes intensiv për më shumë se 14 ditë kishin nivele më të larta të qelizave inflamatore dhe të disa proteinave që lidhen me reagimin imunitar.
Një nga treguesit më të rëndësishëm ishte proteina IL-17A, e cila u dallua si biomarkeri më i saktë për identifikimin e pacientëve me rrezik të lartë.
Sipas autorëve të studimit, zhvillimi i testeve që matin këta tregues biologjikë mund t’u mundësojë mjekëve të identifikojnë më herët pacientët që rrezikojnë komplikime afatgjata dhe të ndërhyjnë në kohë për të përmirësuar trajtimin e tyre.
Studiuesit kanë bërë të ditur se kërkimet do të vazhdojnë për të kuptuar më mirë mekanizmat që çojnë në zhvillimin e sëmundjes kritike kronike dhe për të gjetur mënyra të reja për parandalimin e saj.