Një studim i prezantuar në Kongresin Evropian për Obezitetin (ECO 2025) ka treguar se gratë janë shumë më të informuara dhe kanë një kuptim më të thellë për barnat e obezitetit GLP-1/GIP receptor agonistë (si semaglutide dhe tirzepatide) krahasuar me burrat.
Studimi, i realizuar nga Nadja Auerbach dhe Dr. Austen El-Osta në bashkëpunim me Imperia College London, ka përdorur një anketë në Mbretërinë e Bashkuar me pjesëmarrës të moshës mesatare 44 vjeç dhe me një BMI të mesëm prej 28.4 kg/m2.
Nga 1,297 pjesëmarrës, 87% e grave dhe 68% e burrave kishin informacion të mjaftueshëm rreth këtyre barnave për obezitetin, ndërsa 20% e grave kishin një kuptim të shkëlqyer të këtyre barnave, në krahasim me vetëm 8% të burrave. Rreth 35% e pjesëmarrësve kanë përdorur këto barna, dhe 11% janë të interesuar t’i përdorin në të ardhmen.
Përdoruesit aktualë të këtyre barnave raportuan se ato janë të sigurta dhe efektive, ndërsa shqetësimet më të mëdha nga ata që nuk i përdorin përfshijnë sigurinë, efektet anësore dhe mundësinë e shtimit të peshës pas ndërprerjes.
Studimi gjithashtu tregon se ka një ndërgjegjësim të madh për këto barna, por ekzistojnë disa barriera për përdorimin e tyre, duke përfshirë shqetësimet për sigurinë dhe efektet anësore. Kjo sugjeron nevojën për më shumë edukim dhe informacion për të mbështetur përdorimin e barabartë dhe të informuar të barnave të obezitetit.
Gjetjet e studimit theksojnë rëndësinë e adresimit të keqinformimit në media dhe platforma sociale për të përmirësuar alfabetizimin shëndetësor dhe për të mbështetur vendimmarrjen të informuar nga individët./Gazeta Shneta/