Diagnozat e çrregullimit të mungesës së vëmendjes dhe hiperaktivitetit (ADHD) janë rritur vitet e fundit, ndërsa kanë mbetur të qëndrueshme te adoleshentët.
Diagnozat e ADHD te të rriturit janë rritur me 15% midis 2020 dhe 2023, pas një rënieje prej 11% midis 2016 dhe 2020, raportuan hulumtuesit në një studim të botuar në “Psychiatric Research and Clinical Practice”, shkruan burimi Health Day përcjell Gazeta Shneta.
Po ashtu, shifrat e ADHD tek adoleshentët mbetën të qëndrueshme midis 2018 dhe 2023, pas një rënieje të ndjeshme prej 26% midis 2016 dhe 2018.
Hulumtuesit thonë se këto trende janë të lidhura me një përzierje të faktorëve të ndryshëm, si rritja e njohurive për ADHD dhe përmirësimi i aksesit në shërbime shëndetësore, që mund të çojnë në diagnoza më të shpeshta.
Gjithashtu, zgjerimi i udhëzimeve diagnostikuese për ADHD mund të ketë kontribuar në këtë rritje.
Për studimin, hulumtuesit shqyrtuan regjistrat mjekësorë të mbi 144,000 pacientëve të sistemit shëndetësor “Sisters of Saint Mary”, që operon në Illinois, Missouri, Oklahoma dhe Ëisconsin.
Studimi është një nga përpjekjet më të mëdha për të hetuar diagnozat e reja të ADHD te të rinjtë dhe grup-moshat e tjera, para, gjatë dhe pas pandemisë së COVID-19.
ADHD te të rriturit mund të jetë më i vështirë për t’u identifikuar. Simptomat përfshijnë harrimin, shtyrjen e punëve, shqetësimin kronik, mungesën e përfundimit të detyrave dhe shpesh humbjen e sendeve.
Hulumtuesit përfunduan se gjetjet e studimit mbështesin nevojën për hulumtime të ardhshme për identifikimin e faktorëve të mundshëm të rrezikut, sigurimin e burimeve të mjaftueshme për trajtim dhe zhvillimin e ndërhyrjeve të synuara për të adresuar mangësitë diagnostikuese. /Gazeta Shneta/