Një studim i ri në Britaninë e Madhe ka ngritur shqetësime për përkeqësimin e shëndetit tek gjeneratat e reja, duke treguar se të rinjtë e sotëm po përballen me më shumë probleme shëndetësore sesa brezat e mëparshëm në të njëjtën moshë.
Hulumtimi është realizuar nga studiues të Universiteti Kolegjial i Londrës, Kolegji Mbretëror i Londrës dhe Universiteti i Oksfordit.
Sipas rezultateve, brezat më të rinj po shfaqin nivele më të larta të obezitetit, problemeve të shëndetit mendor dhe diabetit krahasuar me gjeneratat e mëparshme kur krahasohen në të njëjtën periudhë të jetës.
Studiuesit e kanë quajtur këtë fenomen “devijim gjeneracional i shëndetit”, duke theksuar se trendi është më i dukshëm tek obeziteti dhe problemet e shëndetit mendor.
Studimi analizoi të dhënat e mijëra personave të lindur në Britani ndërmjet viteve 1946 dhe 2002, duke u bazuar në 51 studime afatgjata që kanë ndjekur gjendjen shëndetësore të pjesëmarrësve nga lindja deri në moshën madhore.
Sipas ekspertëve, ndryshimet nuk mund të shpjegohen vetëm me diagnostikim më të mirë apo qasje më të avancuar në kujdes shëndetësor.
Ata theksojnë se faktorë si ushqyerja jo e shëndetshme, mungesa e aktivitetit fizik dhe ndikimet sociale e mjedisore kanë ndikuar ndjeshëm në përkeqësimin e shëndetit tek brezat e rinj.
Autorja kryesore e studimit, Laura Gimeno, deklaroi se shoqëria nuk po arrin kufijtë biologjikë të përmirësimit të shëndetit, por po përballet me pasoja të ekspozimeve të parandalueshme sociale dhe mjedisore.
Studiuesit paralajmërojnë se ky trend mund të ketë ndikim serioz në politikat publike dhe planifikimin e sistemeve shëndetësore në të ardhmen, pasi gjithnjë e më shumë persona mund të jetojnë me sëmundje kronike në moshë të re.